„იუვენტუსის“ თავდამსხმელი პაულო დიბალა კორონავირუსით დაინფიცირდა. არგენტინელმა ფეხბურთელმა საზოგადოებას ამის შესახებ სოციალური ქსელის მეშვეობით აცნობა, ინფორმაცია დაადასტურა ტურინული გუნდის ვებვერდმაც.

დიბალასთან ერთად ტესტმა დადებითი პასუხი მის შეყვარებულს, ორიანა საბატინისაც უჩვენა:

„მინდა გითხრათ, რომ ცოტა ხნის წინ მივიღეთ COVID-19-ის ტესტის პასუხები, რომელიც ამჯერად დადებითია ჩემი და ორიანას შემთხვევაში. საბედნიეროდ, თავს იდეალურად ვგრძნობთ. მადლობა შეტყობინებებისთვის და მალე გამოჯანმრთელებას გისურვებთ“, - დაწერა დიბალამ.

დიბალა და ორიანა 11 მარტიდან იზოლირებულნი არიან და ვირუსი უსიმპტომოდ განუვითარდათ. შეგახსენებთ, დიბალა დანიელე რუგანისა და ბლეზ მატუიდის შემდეგ მესამე ფეხბურთელია, რომელსაც კორონავირუსი აღმოაჩნდა.