ჰოლანდიის ეროვნული ნაკრების ყოფილი ფეხბურთელი რობინ ვან პერსი "ფეიენოორდში" თავდამსხმელის მწვრთნელი იქნება. როგორც RTV Rijnmond-ი იუწყება, 36 წლის რობინი კლუბის ახალწვეული თავდამსხმელის რობერტ ბოჟენიკის პირადი მწვრთნელი გახდება. აღნიშნული ინფორმაცია "ფეიენოორდს" ჯერ არ დაუდასტურებია.

ვან პერსიმ საფეხბურთო კარიერა "ფეიენოორდში" 2019 წლის ივლისში კონტრაქტის ამოწურვის შემდეგ დაასრულა. რობინი ამავე კლუბის აკადემიაში ვარჯიშობდა და პირველ გუნდში 2001-2004 წლებში თამაშობდა. ამის შემდეგ ვან პერსიმ "არსენალის", "მანჩესტერ იუნაიტედის" და "ფენერბაჰჩეს" მაისურით ითამაშა და ჰოლანდიაში 2018 წელს დაბრუნდა. კარიერის დასრულების შემდეგ ვან პერსიმ საფეხბურთო ექსპერტად დაიწყო მუშაობა.

რაც შეეხება 20 წლის ბოჟენიკს, რობერტი სლოვაკეთის ეროვნული ნაკრების წევრია და "ფეიენოორდმა" 27 იანვარს "ჟილინადან" ოთხ მილიონ ევროს სანაცვლოდ დაიმატა. ეროვნული ნაკრების მაისურით რობერტს რვა შეხვედრაში ოთხი გოლი აქვს გატანილი.