მადრიდის „რეალის“ მთავარმა მწვრთნელმა, ზინედინ ზიდანმა, „ბარსელონასთან“ მომავალი მატჩის წინ, თავისი აზრი გაუზიარა ჟურნალისტებს.

„ასეთ შეხვედრაში რომ გაიმარჯვო, გულით და გონებით უნდა ითამაშო. მნიშვნელოვანია გუნდური სული, ერთიანობა. ფეხბურთელებს ბევრს ვესაუბრები და ვურჩევ როგორ უნდა იმოქმედონ უეცარი გართულებების დროს მინდორზე.

შესაძლოა, ჩვენი გულშემატკივრები გაწბილებული დარჩნენ შედეგით, მაგრამ ასი პროცენტით დავიხარჯებით და რა გამოვა, ვნახოთ. ახლა ჩვენ და „ბარსელონა“ პირველ-მეორე ადგილებზე ვდგავართ, ამიტომ კატალონიელებთან წარმატებული თამაში, გუნდს სამომავლოდ დამატებით სტიმულს მისცემს.“ - ციტირებს ზიდანის სიტყვებს Goal.com.

„რეალი“ – „ბარსელონას“ შეხვედრა კვირას, 1 მარტს გაიმართება მადრიდის „სანტიაგო ბერნაბეუს“ სტადიონზე და თბილისის დროით ღამის 12 საათზე დაიწყება.