საქართველოს ეროვნული ნაკრებისა და სფფ-ის მწვრთნელთა განათლების კურსების ყოფილი ხელმძღვანელი გაიოზ დარსაძე ფიფაში იმუშავებს. დარსაძე მსოფლიო ფეხბურთის მმართველ უწყებაში გლობალური ფეხბურთის განვითარების ტექნიკური ექსპერტის პოსტზე აღმოსავლეთ ევროპისა და ცენტრალური აზიის მიმართულებით დაინიშნა.

საინტერესოა, რომ ფიფას გლობალური ფეხბურთის განვითარების განყოფილებას ლეგენდარული ფრანგი სპეციალისტი არსენ ვენგერი ხელმძღვანელობს.

აღნიშნული ინფორმაცია ბატონმა გაიოზმა WORLDSPORT.GE-სთან საუბარში თავად დაადასტურა.

„ფიფას გლობალური ფეხბურთის განვითარების ტექნიკური ექსპერტი ვიქნები აღმოსავლეთ ევროპასა და ცენტრალურ აზიაში. ჩემს საქმიანობაში შევა ინსტრუქტაჟი, კონსულტაციები და რჩევების მიცემა მწვრთნელებისთვის ტექნიკურ საკითხებში. ფედერაციებისთვისა და კონფედერაციებისთვის კონსულტაციები და ფეხბურთის განვითარებაში დახმარება. სხვათა შორის, ამ განყოფილებას ფიფაში ცნობილი ფრანგი მწვრთნელი არსენ ვენგერი ხელმძღვანელობს და ერთ-ერთ მიმართულებაში შედის ჩემი საქმიანობაც“, - გვითხრა დარსაძემ.

შეგახსენებთ, გაიოზ დარსაძე მცირე პერიოდით საქართველოს ეროვნულ ნაკრებს წვრთნიდა. ეს 2005 წელს იყო, როდესაც ალან ჟირესი შეცვალა, ხოლო მოგვიანებით, თავად კლაუს ტოპმიოლერმა ჩაანაცვლა.