ესპანეთის ლიგა ენდესაში თორნიკე შენგელიას „ბასკონია“ არასტაბილურ და წარუმატებელ გამოსვლას აგრძელებს. ვიტორიელებმა წინა ტურში მადრიდში „რეალს“ აჯობეს, ამჯერად კი, საშინაო კედლებში „მორაბანკ ანდორასთან“ მარცხი განიცადეს - 73:77.

მატჩის ბედი ბოლო პერიოდმა გადაწყვიტა, რომელიც ანდორელებმა 3-ქულიანი სხვაობით მოიგეს და საბოლოო გამარჯვებაც იზეიმეს.

თორნიკე შენგელიამ, რომელმაც 36:15 წუთი ითამაშა, ორმაგი დუბლი შეასრულა, მაგრამ თააგუნდელებეს გამარჯვებაში მაინც ვერ დაეხმარა. ქართველმა მძიმე ფორვარდმა 13 ქულა, 10 მოხსნა და 2 პასი მიითვალა, 11-დან 6 ორქულიანი (55%) და 4-დან 1 საჯარიმო (25%) ჩააგდო, ხოლო ოთხჯერ სამქულიანი ააცილა (0%). ბუნებრივია, შეტევაში ასეთმა ცუდმა გარჯამ მისი მარგი ქმედების კოეფიციენტზე იმოქმედა, რომელიც მხოლოდ 9-ს გაუტოლდა.

მეტ ჯენინგმა 25:31 წუთში 7 ქულა, 5 პასი და 7 პასი დააგროვა, მისი მარგი ქმედების კოეფიციენტი უკეთესი აღმოჩნდა - 12. ვთქვათ ისიც, რომ შენგელიას გაცუდებულმა სროლებმა ვიტორიელებს ძვირფასი ქულები დააკარგვინა, რაც ვინძლო მარცხის ტოლფასიც აღმოჩნდა...

„ბასკონია“ 9 მოგებითა და 10 წაგებით მეათე ადგილზეა და მომდევნო ტურში 1 თებერვალს, მალაგაში, „უნიკახას“ ესტუმრება.