გერმანიის ბუნდესლიგა განახლდა და დორტმუნდის „ბორუსიაში“ დებიუტი ჰქონდა ერლინგ ჰოლანდს. ნორვეგიელმა ჯერ კიდევ ავსტრიულ „ზალცბურგში“ დაამტკიცა, რომ ფენომენალური თვისებები გააჩნია და ახლა უკვე იგივეს გერმანიაშიც აგრძელებს.

„დორტმუნდმა“ „აუგსბურგი“ მისსავე მოედანზე 5:3 დაამარცხა, ხოლო ჰოლანდს დაუვიწყარი საღამო ჰქონდა. ის მოედანზე 56-ე წუთზე მაშინ გამოჩნდა, როდესაც მისი გუნდი 1:3 მარცხდებოდა.

ჰოლანდს ბუნდესლიგაში სადებიუტო გოლისთვის 183 წამი დასჭირდა და მეტოქის კარი აიღო. ეს ყველაფერი არ ყოფილა, თამაშის ბოლომდე ჰეთ-თრიქის შესრულება მოასწრო და პიერ-ემერიკ ობამეიანგის შემდეგ „დორტმუნდის“ პირველი ფეხბურთელი გახდა, რომელმაც სადებიუტო შეხვედრაში სამი გოლი გაიტანა.