ტურინის „იუვენტუსის“ თავდამხმელმა კრიშტიანუ რონალდუმ „სამპდორიასთან“ შესანიშნავი გოლი გაიტანა და დიდი გამოხმაურება მოჰყვა. პორტუგალიელს გოლს გვერდი ვერ აუარა ვეტერანმა იტალიელმა ფეხბურთელმა მარკო მატერაციმაც.

მარკომ ინსტაგრამში ფოტო გამოაქვეყნა, რომელზეც რონალდუს ნახტომია „სამპდორიასთან“ ასახული და ამასთან თავად მატერაცის გოლი 2006 წლის მსოფლიო ჩემპიონატზე ჩეხეთის კარში. როგორც მატერაცის ფოტოებიდან ვიგებთ, 14 წლის წინ იტალიელი მცველი დარტყმის მომენტში 2.70 მეტრის სიმაღლეზე იმყოფებოდა, ხოლო რონალდუმ მოგეხსენებათ, 2.56 მეტრის სიმაღლიდან დაარტყა.

„ყოჩაღ საჰაერო კრიშტიანუ, თითქმის ჩემსავით. კომპლიმენტი გოლისთვის“, - დაწერა მატერაციმ.

უნდა აღინიშნოს, რომ მატერაცი რონალდუზე მინიმუმ 6 სმ-ით მაღალია და თავითაც მშვენივრად თამაშობდა, როგორც პორტუგალიელი ლეგენდა.