„ელ კლასიკო“ უგოლოდ დასრულდა და მილიონობით მაყურებლის მოლოდინი ვერ გაამართლა. ძნელია გავიხსენოთ ბოლოს როდის შედგა ასეთი მოსაწყენი დაპირისპირება კატალონიის „ბარსელონასა“ და მადრიდის „რეალს“ შორის.

თუმცა შეგვიძლია გავიხსენოთ, რომ ეს იყო პირველი 0:0 6 235 დღის შემდეგ! აქამდე, „ელ კლასიკო“ უგოლოდ ყველა ტურნირის ჩათვლით ბოლოს 2002 წლის ნოემბერში დასრულებულიყო და როგორც Opta იტყობინება, მას შემდეგ 6 235 დღე გავიდა - 17 წელი!

გარდა ამისა, ზინედინ ზიდანი ისტორიაში შევიდა: ფრანგმა „კამპ ნოუზე“ „რეალის“ თავკაცის რანგში მეხუთე „ელ კლასიკო“ ჩაატარა დაუმარცხებლად (2 მოგება, 3 ფრე). აქამდე „სამეფო კლუბის“ არცერთი მწვრთნელისთვის „ბარსელონასთან“ სტუმრად ჩატარებული საწყისი 5 შეხვედრა მარცხის გარეშე არ დასრულებულა.

სხვა მხრივ, გუნდებმა ქულები გაინაწილეს და სატურნირო ცხრილში ლიდერის პოზიციასაც ინაწილებენ. ორივეს 36-36 ქულა აქვთ და "ბარსელონა" პირველ ადგილზე მხოლოდ იმიტომაა, რომ ბურთების ოდნავ უკეთესი ბალანსი გააჩნია.