ვირჯილ ვან დეიკი „ოქროს ბურთისთვის“ ბრძოლაში ლიონელ მესისთან დამარცხდა და ჰოლანდიელის მაქსიმუმი ჩინებული სეზონის მიუხედავად მეორე ადგილი გამოდგა.

ბუნებრივია, გამოქვეყნდა ყველა ხმა და ქულა, რომელიც ფეხბურთელებმა მიიღეს და გაირკვა, რომ ვან დეიკის დამარცხებაში მთავარი „დამნაშავე“ სადიო მანე გახლავთ - თანაგუნდელი „ლივერპულიდან“.

საქმე ისაა, რომ თითქმის ყველა ჟურნალისტის მიერ მესი და ვან დეიკი ერთმანეთის კონკურენტები იყვნენ და ან ერთი იყო პირველ ადგილზე, ან მეორე - მეორე საფეხურზე. გამონაკლისი მხოლოდ აფრიკის კონტინენტია, სადაც სადიო მანემ ვან დეიკს აჯობა, მაგრამ მესის - ვერ.

სწორედ აფრიკაში დაკარგული ქულები დაუჯდა ძვირად ჰოლანდიელს. კერძოდ, აფრიკიდან ქულები ასე გადანაწილდა: მესი -187, მანე -170 და ვან დეიკი 154.

ეს ცხადია, გადამწყვეტი გამოდგა, რადგან მთლიანობაში ლეომ ვირჯილს მხოლოდ 7 ქულით აჯობა. ყველაფერი პირიქით რომ ყოფილიყო და მანეზე მეტი ხმა აფრიკიდანაც ვან დეიკს მიეღო, „ლივერპულის“ უკანახაზელი უსათუოდ შეძლებდა „ოქროს ბურთის“ დაუფლებას.

გეტყვით იმასაც, რომ აფრიკის კონტინენტიდან მხოლოდ კენია, მოზამბიკი და ტუნისი გამოდგა ის ქვეყნები, რომლებმაც მანე ხუთეულში არ შეიყვანეს.