კალათბურთი

4:34 | 4.11.2019 | ნანახია [] - ჯერ

გოგა ბითაძის ნაყოფიერი თამაში NBA-ში: ქართველი დაფარებებში უბადლოა!

ეროვნულ საკალათბურთო ასოციაციაში გოგა ბითაძის „ინდიანა პეისერსმა“ „ჩიკაგო ბულსს“ უმასპინძლა და 108:95 დაამარცხა. ინდიანაპოლისელები უპირატესობას თავიდანვე დაეუფლნენ და შეიძლება ითქვას, პრობლემების გარეშე იმარჯვეს.

ბითაძე ამჯერად წინა მატჩივით ორმაგი დუბლის ზღვარზე არ ყოფილა, მაგრამ ურიგოდ არ გარჯილა და მეტიც, შეგვიძლია ვთქვათ, რომ სტაბილურად ითამაშა.

20 წლის ქართველმა ცენტრმა მოედანზე 18:57 წუთი გაატარა და შეტევაში 57%-იანი სიზუსტით ითამაშა. ბითაძემ საკუთარ გუნდს 9 ქულა, 4 მოხსნა, 3 პასი და 4 დაფარება შესძინა, 6-დან 3 ორქულიანი და 1-დან 1 სამქულიანი ჩააგდო.

„ინდიანას“ რიგებში გამორჩეული თი ჯეი ვორენი (26 ქულა, 5 მოხსნა, 3 პასი) და მალკოლმ ბროგდონი იყვნენ (22 ქულა, 3 მოხსნა, 7 პასი). სხვათა შორის, ბითაძეს დაფარებებში ბადალი არ ჰყოლია და 4 ბლოკი ორივე გუნდის რიგებში ყველაზე მაღალი მაჩვენებელი გახლდათ.

„ინდიანა პეისერსმა“ სეზონის სტარტზე განცდილი სამი მარცხის შემდეგ ზედიზედ მესამედ იმარჯვა და აღმოსავლეთ კონფერენციაში მეექვსე ადგილზეა. მომდევნო შეხვედრას კი, 6 ნოემბერს, სტუმრად „შარლოტ ჰორნეტსთან“ გამართავს.

0.125378