ქუთაისის „ტორპედოს“ მთავარმა მწვრთნელმა კახა ჩხეტიანმა გუნდში არსებულ ვითარებაზე ისაუბრა. ქართველი სპეციალისტის განცხადებით, არსებობს ინტერესი და იმედოვნებს, რომ ხელისშემშლელი ფაქტორები არ წარმოიქმნება.

გარდა ამისა, ჩხეტიანმა „საბურთალოსთან“ საქართველოს თასის ნახევარფინალზეც გააკეთა კომენტარი, რომელიც იმერულმა გუნდმა 0:2 წააგო.

„არის რაღაც ინტერესი, მეც მქონდა შეხვედრები და ვიმედოვნებ, რომ ეს ყველაფერი მალე გადაწყდება. თამაშს რაც შეეხება, სულ ჩვენ ხომ არ ვითამაშებთ თასის ფინალში? სამი წელიწადშია ვთამაშობთ და სხვამაც ითამაშოს (იღიმის - რედ). მინდა მივულოცო „საბურთალოს“ დამსახურებული გამარჯვება, ჩემს ბიჭებს კი მადლობას ვუხდი. ასეთი რეალობა გვაქვს, ვალდებულები ვართ მოედანზე გამოვიდეთ და ვითამაშოთ. ბიჭებმაც მოილაპარაკეს და თქვეს, რომ ქუთაისისთვის ბოლომდე დაიხარჯებიან, სეზონს ბოლომდე მიიყვანენ და დარწმუნებული ვარ, პრობლემა არ შეგვექმნება. იმედია, მანამდე ყველაფერი გაირკვევა და ყველა დაისვენებს.

ბიჭებმა გადაწყვიტეს, რომ გააგრძელონ თამაში, რომც არ მიეღოთ ეს გადაწყვეტილება, არავის არაფერი ექნებოდა სათქმელი. ამას ქალაქისთვის, გულშემატკივრებისთვის აკეთებენ, მეც რაც შემეძლება, მაგათ გვერდით ვიქნები ყოველთვის.

გუშინ მქონდა მე პირადად შეხვედრა, ხვალ მერიაში უნდა მივიდეთ. უნდათ, რომ მრავალწლიანი გეგმით აიყვანონ გუნდი თავისი აკადემიით და ყველაფრით. ვფიქრობ, საწინააღმდეგო არაფერი მოხდება და ვიმედოვნებთ, რომ ხელისშემშლელი პრობლემა არ წარმოიშვება“, - თქვა ჩხეტიანმა.