ფეხბურთი

14:23 | 14.10.2019 | ნანახია [] - ჯერ

"სტად დე ფრანსზე 30 ათას თურქს ელოდებიან - პარიზში უსაფრთხოების ზომებს აძლიერებენ

დღეს, „სტად დე ფრანსზე“ საფრანგეთის ნაკრები თურქეთს უმასპინძლებს საკმაოდ მაღალი რისკის მქონე შეხვედრაში. გარდა იმისა, რომ ორივე ნაკრები ევროპის ჩემპიონატზე მოსახვედრად იბრძვის, თამაშს პოლიტიკური ელფერიც ახლავს.

საფრანგეთსა და თურქეთს შორის ბოლო დროს პოლიტიკური ურთიერთობა სირიასთან კონფლიქტის გამო მეტისმეტად გაუარესდა. პარიზმა ანკარას ოფიციალურად მოუწოდა, რომ ქურთებზე სამხედრო შეტევა შეეჩერებინა, თუმცა ეს მოწოდება თურქეთმა ყურად არ იღო.

როგორც ფრანგული მედია წერს, „სტად დე ფრანზე“ თურქეთი თავს სტუმრად არ იგრძნობს, რადგან გერმანიიდან და ბელგიიდან 30 ათას თურქ გულშემატკივარს ელოდებიან. გარდა ამისა, მოსალოდნელია, რომ ისინი საფრანგეთის ჰიმნს დაუსტვენენ და თურქეთის ნაკრებს სამხედრო სალამით მიესალმებიან.

პარალელურად საფრანგეთის მთავრობა ყველაფერს აკეთებს, რომ მატჩის უსაფრთხოება უზრუნველყოს. გააძლიერა ტექნიკური მოწყობილობები, სტადიონზე 600 აგენტი და 1400 სტიუარდი იქნება. ცოტა ხნის წინ „გალათასარაი“ - პსჟ-ს შეხვედრის დროს ქომაგებს შორის დაპირისპირება მოხდა, რასაც შესაძლოა გაგრძელება პარიზში მოჰყვეს.

ასევე ცნობილი ხდება, რომ „მარსელიოზა“ მაქსიმალურად ხმამაღალზე აჟღერდება სტადიონზე, თურქებისგან მოსალოდნელი სტვენის გადასაფარად.

აქვე გეტყვით, რომ ამ გუნდების პირველი შეხვედრა ქონიაში მასპინძლებმა 2:0 მოიგეს. საფრანგეთსაც და თურქეთსაც 18-18 ქულა აქვთ და ახლოს არიან ფინალურ ეტაპთან, ხოლო დღეს გამარჯვებული ავტომატურად გაიფორმებს ევროპის ჩემპიონატის საგზურს.

0.164029