ფეხბურთი

3:54 | 13.10.2019 | ნანახია [] - ჯერ

ოფიციალურად: იტალია ევრო 2020-ის ჯგუფური ეტაპის სამივე მატჩს რომში ჩაატარებს

იტალიის ეროვნულმა ნაკრებმა ევრო 2020-ის საგზური საკვალიფიკაციო ეტაპის დასრულებამდე სამი ტურით ადრე ოფიციალურად მოიპოვა. საინტერესოა, რომ „სკუადრა აძურასთვის“ ეს საუკეთესო შედეგია.

საქმე ისაა, რომ აქამდე იტალიის ნაკრებს საკვალიფიკაციო ეტაპის დასრულებამდე სამი ტურით ადრე დიდი საფეხბურთო ფორუმის საგზური არასდროს გაეფორმებინა.

შედეგად, უკვე ცნობილია, რომ ევროპის ჩემპიონატზე იტალია A ჯგუფში ითამაშებს და ჯგუფური ეტაპის სამივე მატჩს საკუთარ მოედანზე, კერძოდ, რომში, „სტადიო ოლიმპიკოზე“ გამართავს. ვთქვათ ისიც, რომ 12 ივნისს გახსნის მატჩშიც იტალიის ნაკრები ითამაშებს.

მოგეხსენებათ, დამდეგი ევროპირველობა სხვადასხვა ქვეყნების 12 ქალაქში გაიმართება. A ჯგუფის მატჩებს რომი და ბაქო, B ჯგუფს სანქტ-პეტერბურგი და კოპენჰაგენი, C ჯგუფს ამსტერდამი და ბუქარესტი, D ჯგუფს ლონდონი და გლაზგო, E ჯგუფს ბილბაო და დუბლინი, ხოლო F ჯგუფს მიუნხენი და ბუდაპეშტი უმასპინძლებენ.

ამრიგად, „სკუადრა აძურას“ პლეი-ოფამდე თამამად შეეძლება, რომ თავი საკუთარ კედლებში იგრძნოს...

0.097479