კატალონიის „ბარსელონას“ ნახევარცველი ივან რაკიტიჩი კლუბში თავისი ყოფით უკმაყოფილოა. 31 წლის ფეხბურთელმა ლა ლიგის მიმდინარე სეზონში 8 მატჩიდან მხოლოდ 5 ჩაატარა და სასტარტო შემადგენლობაში ერთადერთხელ ითამაშა.

რაკიტიჩი ამბობს, რომ თამაში უნდა და თუ სიტუაცია არ შეიცვლება, კლუბს დატოვებს.

„არ ვიცი რა მოხდება. ამჟამად რთულ ვითარებაში ვარ, რადგან თამაში მინდა და არამხოლოდ გუნდის ნაწილად ყოფნა. ყველაფერს გავაკეთებ სიტუაციის შესაცვლელად მომდევნო მატჩებში. ორწლიანი კონტრაქტი მაქვს და „ბარსელონაზე“ უკეთესი ადგილი არ არსებობს, საუკეთესო გუნდია მსოფლიოში, მაგრამ ვიმეორებ, თამაში მჭირდება.

„ბარსელონასთვის“ საუკეთესო მინდა, მაგრამ ასევე მინდა, რომ მოედანზე ვიბრძოლო. თუ სიტუაცია არ შეიცვლება, კლუბის ხელმძღვანელობასთან დავილაპარაკებ“, - თქვა რაკიტიჩმა.

შეგახსენებთ, რომ ხორვატი ფეხბურთელი ზაფხულში „იუვენტუსთან“ ძალიან ახლოს იყო, მაგრამ ტრანსფერი ბოლო მომენტში ჩაიშალა. ამჯერად კი, ყველაზე აქტიურად „ინტერს“ უკავშირებენ.