პოლ პოგბამ ნიუკასლთან ბოლო სამარცხვინო მატჩი გამოტოვა, რომელშიც მისმა „მანჩესტერ იუნაიტედმა“ 0:1 წააგო და პრემიერლიგის ცხრილში მე-12 ადგილამდე გაქვეითდა. ეს ყველაზე ცუდი მაჩვენებელია ბოლო 30 წლის განმავლობაში. ფრანგი მსოფლიო ჩემპიონი ახლა დუბაიშია და ინდივიდუალური პროგრამით ემზადება ლივერპულთან მომავალო მატჩისთვის, რომელიც 20 ოქტომბერს გაიმართება „ოლდ ტრაფორდზე.“

The Sun - ის ფოტორეპორტიორებმა ის დუბაიში დააფიქსირეს, 37 გრადუს სიცხეში როგორ მუშაობს ინტენსიურად სავარჯიშო ველოსიპედზე. მარჯვენა ფეხზე სამედიცინო ფეხსაცმელი აცვია, ტანზე კი მანჩესტერის ეკიპირება. იქვე ჩანს მსოფლიოში ყველაზე მაღალი შენობა, 828 მეტრიანი ბურჯ-ჰალიფა.

მიმომხილველი აღნიშნავს, ბურჯ-ჰალიფა ხომ მაღალია, მაგრამ პოგბას და „მანჩესტერს“ უფრო მაღალი პრობლემები აქვთო.

პოგბამ გუნდის ხელმძღვანელობისგან მიიღო ნებართვა სარეაბილიტაციო პერიოდი ცხელ დუბაიში გაეტარებინა. ის „ლივერპულთან“ შემდეგი ტურის მატჩისთვის საგანგებოდ ემზადება.