საქართველოს კრისტალბეთ ეროვნული ლიგის 30-ე ტური, რომელიც გუშინ დაიწყო, დღეს გაგრძელდა და ორი თამაში უკვე ჩატარდა.

რუსთავში, საქართველოს მოქმედი ჩემპიონი „საბურთალო“ ჩავიდა და მორიგი გამარჯვების მოპოვება არ გასჭირვებია. გიორგი ჭიაბრიშვილის გუნდი ლიდერთა დუეტს საგრძნობლად ჩამორჩა და ვინაიდან მისი კონკურენტები ამ ტურში ერთმანეთს ხვდებიან, „რუსთავი“ აუცილებლად უნდა დაემარცხებინა. თბილისურმა გუნდმა დასახულ ამოცანას თავი დამაჯერებლად გაართვა. პირველ ტაიმში ანგარიში ოგნიენ როლოვიჩმა გახსნა, ხოლო ნაატრაქტევს სტუმართა უპირატესობა გაიზარდა. გიორგი კოხრეიძემ და გიორგი გაბედავამ ანგარიშს სოლიდური სახე მისცეს - 3:0.

„საბურთალოს“ 57 ქულა აქვს და ჩემპიონობის შანსს ჯერაც ინარჩუნებს. „რუსთავი“ 34 ქულით პლეი-აუტის ზონაში იმყოფება და ცდილობს ელიტაში ადგილი პირდაპირ შეინარჩუნოს.

დღესვე, საჩხერის „ჩიხურამ“ წარუმატებელი სერია დაასრულა და ეს „ვიტ ჯორჯიას“ ძველით მოახერხა. სოსო ფრუიძის გუნდი სწრაფადვე, მეორე წუთზე გიორგი კორიფაძის პენალტით დაწინაურდა. „ვიტელებმა“ მეორე ნახევარში პენალტს პენალტითვე უპასუხეს, რომელიც მუსელიანმა ზუსტად დაარტყა. თუმცა, ბოლო წუთზე მთავარმა მსაჯმა მესამედ დანიშნა თერთმეტმეტრიანი, ამჯერად საჩხერელთა სასარგებლოდ და კორიფაძე ისევ უშეცდომო იყო.

„ჩიხურამ“ ამ გამარჯვებით „რუსთავს“ გადაასწრო და პლეი-აუტის ზონა დატოვა, „ვიტ ჯორჯიას“ მდგომარეობა კი, კარგა ხანია მძიმეა და ეროვნულ ლიგა 2-ში დაქვეითებისგან ალბათ ვეღარაფერი იხნის.

30-ე ტური დღეს ბათუმში, სუპერმატჩით დასრულდება, რომელშიც ჩემპიონობის მთავარი კანდიდატები, ბათუმის „დინამო“ და „დინამო თბილისი“ გაეჯიბრებიან. ორივე გუნდს 61-61 ქულა აქვს და შესაძლოა, დღევანდელმა დუელმა ბევრი რამ გაარკვიოს.

„რუსთავი“ – „საბურთალო“ 0:3 (0:1)

გოლები: 0:1 როლოვიჩი (26), 0:2 კოხრეიძე (49), 0:3 გაბედავა (61)

„ჩიხურა“ – „რუსთავი“ 2:1 (1:0)

გოლები: 1:0 კორიფაძე (2, პენ), 1:1 მუსელიანი (70, პენ), 2:1 კორიფაძე (90, პენ)