თბილისის "საბურთალომ" "დინამო თბილისთან" (1:2) მატჩის შემდეგ წერილი გამოაქვეყნა, რომლის მიხედვითაც მატჩის საუკეთესო მოთამაშედ შეხვედრის მთავარი არბიტრი გიორგი ყრუაშვილი დაასახელეს.

"საბურთალო" ვებგვერდი ყრუაშვილის მიერ დაშვებულ შეცდომებზე ამახვილებს ყურადღებას და წაგებას მთლიანად მსაჯის პასუხისმგებლობას აკისრებს.

საქართველოს ჩემპიონის ვებგვერდზე გამოქვყენებული წერილი ასეთია:

"სათაური სრულად ასახავს მატჩის სცენარს – დიახ, 2 ოქტომბერს „დინამო არენაზე“ „საბურთალო“ მსაჯებთან დამარცხდა! მთავარ როლში ფიფას კატეგორიის მსაჯი, საქართველოში „ვითომ“ პერსპექტიული გიორგი ყრუაშვილი იყო, როლებში კი მისი ასისტენტ-დამხმარეები – შოთა ქუხილავა, გიორგი ვარდიძე და ძმანი მისნი. პირდაპირ შეიძლება იმის თქმა, რომ გუშინ გამართულ შეხვედრაში მსაჯები მიზანმიმართულად მოქმედებდნენ „საბურთალოს“ წინააღმდეგ, რამაც საბოლოო შედეგზე გავლენა იქონია.

გუშინ, ყრუაშვილმა მორიგი სამარცხვინო ფურცელი ჩაწერა თავის ახალგაზრდულ ცხოვრებაში – 75-ე წუთამდე თავისი საქმე „გააკეთა“, მერე კი განაგრძო ჩვეულებრივი მსაჯობა. მატჩის მე-4 წუთზე აშკარა თერთმეტმეტრიანი არ დანიშნა „საბურთალოს“ სასარგებლოდ, მე-19 წუთზეც შეეძლო პენალტის დანიშვნა, თუმცა ამ შემთხვევაში საკამათო ეპიზოდი იყო. ყრუაშვილი საბურთალოელების უხეშობისთვის და მაისურზე დაქაჩვისთვის ყვითელ ბარათებს უჩვენებს ფეხბურთელებს, ანალოგიური ქმედებებით მასპინძლებს მხოლოდ სიტყვიერად აფრთხილებს. შეხვედრის 69-ე წუთზე „საბურთალო“ 10 კაცით დარჩა, ხოლო 75-ე წუთზე ისეთ თერთმეტმეტრიანს ნიშნავს „საბურთალოს“ კარში, რომ „დინამოს“ თავგადაკლული ქომაგიც კი გააკვირვა!

არ ვიცი, იცით თუ არა, შესაძლოა სიახლეს ვამბობ, მაგრამ საქართველოში მსაჯი უშეცდომოა! ყოველშემთხვევაში ამას გვიმტკიცებენ მსაჯთა კორპუსში – არ მახსენდება პრეცედენტი, როდესაც მსაჯთა ხელმძღვანელებს ეღიარებინოთ ამა თუ იმ მსაჯის შეცდომა, ან რომელიმე მათგანით უკმაყოფილება გამოეთქვათ. ჰოდა, ვიდრე მსგავსი მიდგომა იქნება, ვიდრე რეალურად არ შეაფასებენ ამა თუ იმ ადამიანის ქმედებას, მანამდე ასეთ დღეში ვიქნებით.

როგორ ფიქრობთ, გუშინ პირველი შემთხვევა იყო, როდესაც მსაჯები ასე „ჭკვიანურად“ მსაჯობენ „საბურთალოს“ წინააღმდეგ? სულ მცირე ხნის წინ საბურთალოს მონაწილეობით მატჩში ანალოგიურად, ერთი-ერთში მოიქცა ყრუაშვილის კოლეგა ჯენერი ხორავა! ამ დუეტს დიდად არც გიორგი კიკაჩეიშვილი ჩამოუვარდება… რომ დააკვირდეთ „საბურთალოს“ მატჩებს ზედა ხუთეულის გუნდებთან, სადაც უფრო დიდი შანსია გუნდმა ქულები დაკარგოს, ხშირ შემთხვევაში სწორედ ამ „სამეულს“ ნიშნავენ მთავარ არბიტრებად.

არ იფიქროთ, მხოლოდ წლეულს მსაჯობენ არბიტრები ტენდენციურად „საბურთალოს“ საპირისპიროდ. მიუხედავად იმისა, რომ გასულ წელს კლუბი ისტორიაში პირველად ქვეყნის ჩემპიონი გახდა, მაშინაც იყო მიზანმიმართული ბრძოლა, მაგრამ 2018 წელს ჩვენმა კლუბმა ყველანაირი ბარიერი დაძლია და დასახულ მიზანს მიაღწია!

ზოგადად, მსაჯების არაკომპეტენტურობა და ხშირ შემთხვევაში მიკერძოებული მიდგომა, ქმნის არაკონკურენტულ გარემოს, აჩენს უსამართლობის გრძნობას, რაც თავისთავად ინტერეს აკარგვინებს ინვესტორებს და რაც ყველაზე მთავარია, ფეხბურთის გულშემატკივრებს. ყოველივე ეს ფაქტორი, ხელს უშლის ქართული ფეხბურთის განვითარებას.

მსაჯებზე საუბარს ყოველთვის ვერიდებით, მაგრამ ეს ის შემთხვევაა, უთქმელობა დანაშაულად მიგვაჩნია და გულისტკივილი მოვიტანეთ გულშემატკივრამდე. რაც შეეხება მატჩს – ვიდრე „საბურთალო“ კაცნაკლული დარჩებოდა მეტოქეს აღემატებოდა თამაშითაც და ანგარიშითაც. მხოლოდ პირველ ტაიმში გატანილი გოლის გარდა, სამჯერ მართებდა გიორგი ჭიაბრიშვილის გუნდს „დინამოს“ კარის აღება, მაგრამ… ბოლოს კი, რაც მოხდა და როგორც მოხდა, ზემოთ ვრცლად გითხარით. დანარჩენი კი ყველაფერი თავად განსაჯეთ…", - წერს "საბურთალოს" ვებგვერდი.

შეგახსენებთ, რომ ამ მატჩის შემდეგ გიორგი ჭიაბრიშვილის გუნდი თბილისისა და ბათუმის "დინამოებს" 7 ქულით ჩამორჩა და სეზონის დასრულებამდე მხოლოდ შვიდი ტურია დარჩენილი.