ბელგიური „ლოკერენის“ რიგებში სადებიუტო გოლის გატანა შეძლო გიორგი ბერიძემ. ჩვენებურის გუნდი ბელგიის თასის 1/16 ფინალში სტუმრად „ანტვერპენს“ დაუპირისპირდა და დამატებით დროში 2:4 დამარცხდა. შესაბამისად, ტურნირს გამოეთიშა.

მატჩი დრამატული გამოდგა. ძირითადი დრო ფრედ დასრულდა (2:2), ხოლო დამატებით დროში მასპინძლებმა ორი უპასუხო გოლი გაიტანეს.

ბერიძემ კი, თავის გამოჩენა მე-10 წამზე მოახერხა და იმ დროისთვის თავისი გუნდი წინ გაიყვანა (1:0). გოლი მართლაც მოხდენილი გამოვიდა - ქართველი მარცხენა ფლანგიდან შეიჭრა საჯარიმოში და მეკარისგან შორეული ცხრიანი დალაშქრა.

შეგახსენებთ, გიორგი „ლოკერენში“ „გენტმა“ ცოტა ხნის წინ გაანათხოვრა და ქართველმა ახალ გუნდში დღემდე 4 თამაშის ჩატარება მოასწრო.