ყაზახეთის დედაქალაქ ნურსულთანში მიმდინარე მსოფლიო ჩემპიონატზე ბერძნულ-რომაულ სტილით ჭიდაობაში ფინალს მიღმა დარჩა გიორგი მელია.

ჩვენებური ნახევარფინალში გამოცდილ სომეხ არტურ ალექსანიანს დაუპირისპირდა და მიუხედავად იმისა, რომ თავიდან იგებდა, საბოლოოდ მარცხი განიცადა (1:3) და ბრინჯაოს მედლისთვის ბრძოლა მოუწევს.

თუმცა, უნდა ვთქვათ, რომ მელიას მსოფლიო ჩემპიონატზე დებიუტი ჰქონდა და ამის კვალობაზე ჩინებულად იჭიდავა, მედლის მოპოვების შანსი აქვს და თანაც, 97 კგ წონით კატეგორიაში საქართველოს ტოკიოს 2020 წლის ოლიმპიური თამაშების ლიცენზია გაუფორმა.

ვთქვათ, რომ მელიამ პირველ წრეში ჰონდურასელი კევინ მეხია კასტილიო დაამარცხა (5:0), შემდეგ მასპინძელთა წარმომადგენელ იერუსლან ისკაკოვს აჯობა (4:0), მეოთხედფინალში კი, ფრანგი მელონინ ნუმონვი დაამარცხა (5:1).

ცნობისთვის, 87 კგ წონით კატეგორიაში პირველივე წრეში წააგო გურამ ხეცურიანმა აზერბაიჯანელ ისლამ აბასოვთან (0:4), ხოლო 67 კგ წონით კატეგორიაში შმაგი ბოლქვაძე აგრეთვე პირველივე დაპირისპირება დათმო ეგვიპტელ მოჰამედ იბრაჰიმ ელსაიედთან (1:9), შემდეგ ეგვიპტელიც ფინალს მიღმა დარჩა, რამაც შმაგის რეპეშაჟში გამოსვლის შანსი მოუსპო. შედეგად, ხსენებულ ორ წონით კატეგორიაში საქართველო ოლიმპიური ლიცენზიის გარეშე დარჩა, თუმცა, წინ სხვა ტურნირებია, სადაც კვლავ შესაძლებელი იქნება ლიცენზიების მოპოვება.

ბოლოსკენ შეგახსენებთ, დღეს ოქროს მედლისთვის იჭიდავებენ ნუგზარ წურწუმია (55 კგ) და ლაშა გობაძე (82 კგ). ხსენებულ წონით კატეგორიებში ფინალები 17:00 საათიდან დაიწყება.