ფეხბურთი

15:20 | 3.09.2019 | ნანახია [] - ჯერ

ლევან შენგელია: "დინამო" ჩემთვის ძალიან ძვირფასია და გადაწყვეტილების მიღება გამიჭირდა"

თურქული "ქონიასფორის" ქართველი ახალწვეული ლევან შენგელია ყოფილ გუნდს, "დინამო თბილისს" სპეციალური წერილით დაემშვიდობა. 23 წლის ფეხბურთელის განცხადებით, გადაწყვეტილების მიღება ძალიან გაუჭირდა, რადგან "დინამოში" თავს ბედნიერად გრძნობდა.

"პირველ რიგში მინდა დავიწყო იქედან რომ, ძალიან გამიჭირდა გადაწყვეტილების მიღება თუ სად გამეგრძელებინა კარიერა. ეს იმის გამო, რომ "დინამოში" თავს ვგრძნობდი ყველაზე ბედნიერად და ეს იყო ყველას დამსახურება, დაწყებული პრეზიდენტიდან, რომელიც ყველაფერს აკეთებდა, რომ მეგრძნო თავი კომფორტულად და დამთავრებული თითოეული სტაფის წევრიდან, მინდა ასევე მადლობა გადავუხადო ჩისკოს და მის სტაფს ასეთი პროფესიონალიზმისთვის და კომფორტისთვის, რაც გუნდში არის და ის ერთიანობა, რომელშიც თითოეული ფეხბურთელია ჩართული. ასევე მინდა დიდი მადლობა გადავუხადო "დინამოს" გულშემატკივრებს ყველას და განსაკუთრებით ჩვენს ელიტას, რომლებიც სულ ჩვენს გვერდით არიან და სულ ვგრძნობდი მათგან სიყვარულს. საბოლოოდ მინდა ვთქვა, რომ "დინამო" არის ჩემთვის ძალიან ძვირფასი და რა თქმა უნდა ნომერ პირველი გუნდი საქართველოში. დარწმუნებული ვარ "დინამო" წელს ჩემპიონობას იზეიმებს და მეც ამის ნაწილი ვიქნები!!!" - დაწერა სოციალურ ქსელში შენგელიამ.

შეგახსენებთ, ლევან შენგელია "დინამოს" ღირსებას 2018 წლიდან იცავდა და 50 მატჩში 25 გოლის გატანა მოახერხა. ქართველმა შემტევმა "ქონიასფორთან" 2+1-წლიანი კონტრაქტი გააფორმა და 19-ნომრიანი მაისური მოირგო.

0.11843