ავტოსპორტი

4:33 | 30.08.2019 | ნანახია [] - ჯერ

„მერსედესმა“ ბოტასს კონტრაქტი გაუგრძელა

„მერსედესის“ ფორმულა 1-ის გუნდმა თავის ფინელ მრბოლ ვალტერი ბოტასს, ვისაც ამჟამად ჩემპიონატში მეორე ადგილი უკავია, კონტრაქტი ერთი სეზონით გაუგრძელა. ამით წერტილი დაესვა იმის ჭორებს იმის შესახებ, რომ მომავალ სეზონში, ლუის ჰამილტონის თანაგუნდელი ფრანგი ესტებან ოკონი იქნებოდა.

„ამ სეზონის წინ, ვალტერის მიზნად დავუსახეთ, რომ სეზონის პირველ ნახევარში იმაზე უკეთ უნდა ეასპარეზა, ვიდრე 2018 წლის პირველ ნახევარში. მან ეს შეძლო, პირველ რბოლებში კი მართლაც შესანიშნავად იასპარეზა. ამის მიუხედავად, ის უფრო მეტზეა მოწადინებეული და საკუთარი დონის ასამაღლებლად თავდაუზოგავად შრომობს. ეს კი ისაა, რასაც ჩვენი გუნდის ყველა წევრისგან მოვითხოვთ“ , - განაცხადა „მერსედესის“ გუნდის შეფმა ტოტო ვოლფმა.

ფინელმა მრბოლმა ეს სეზონი მართლაც შესანიშნავად დაიწყო - პირველივე რბოლა მოიგო ავსტრალიაში, რასაც ბაჰრეინსა და ჩინეთში მეორე ადგილები მოაყოლა, აზერბაიჯანში კი ისევ მოიგო. მას შემდეგ, ბოტასს მოგება აღარ აქვს, თუმცა კვალიფიკაციებში ტიტულოვან თანაგუნდელთან თანაბრადაა. და რაც მთავარია, ჩემპიონატში მეორე ადგილზეა, თუმცა სეზონის განახლების წინ, მხოლოდ 7 ქულასღა უგებს მაქს ფერსტაპენს.

„ძალიან მიხარია და ვამაყობ იმით, რომ ამ გუნდის ნაწილი მეოთხე სეზონშიც ვიქნები. მინდა, მადლობა გადავუხადო გუნდის ყველა წევრს და ხელმღვანელობას, რომელმაც ასეთი ნდობა გამომიცხადა. ჩემი გამოსვლები სულ უფრო და უფრო უკეთესია და ეს კონტრაქტი, 2019 წლის სეზონის მეორე ნახევრის კარგი დასაწყისია. ჩემი მიზანი, ფორმულა 1-ის ჩემპიონობაა. „მერსედესი“ კი საუკეთესო საშუალებაა იმისათვის, რომ ამ მიზანს 2020 წელს მივაღწიო“, - განაცხადა ბოტასმა.

0.140757