დორტმუნდის „ბორუსიას“ აწ უკვე ყოფილი ფეხბურთელი შინჯი კაგავა გიორგი პაპუნაშვილის თანაგუნდელი გახდა და ამიერიდან „სარაგოსაში“ ითამაშებს. არაგონული გუნდის ცნობით, იაპონელთან კონტრაქტი 2021 წლის 30 ივნისამდე გაფორმდა.

კაგავამ კარიერა სამშობლოში „სერეზო ოსაკას“ რიგებში დაიწყო, ხოლო სახელი „დორტმუნდში“ გაითქვა 2010-2012 წლებში. შემდგომ 2 სეზონი „მანჩესტერ იუნაიტედში“ გაატარა და ისევ „დორტმუნდს“ დაუბრუნდა.

თუმცა, ლუსიენ ფავრის მთავარ მწვრთნელად დანიშვნის შემდეგ კაგავამ გერმანული გუნდის ძირითად შემადგენლობაში ადგილი დაკარგა. შედეგად, მიმდინარე წლის იანვარში იჯარით „ბეშიქთაშში“ გადაბარგდა.

იაპონიის ნაკრებში 30 წლის კაგავას 97 თამაში აქვს ჩატარებული და მეტოქეთა კარში 31 გოლი გაიტანა.