დღეს, 27 წლის ქართველ ჩოგბურთელ ნიკოლოზ ბასილაშვილს მორიგი გამოცდა ელის. კანადის ქალაქ მონრეალში მიმდინარე მასტერსზე (საპრიზო ფონდი 6 338 885 დოლარი) მე-13 ნომრად განთესილი ბასილაშვილი მერვედფინალში მე-3 რეიტინგის მქონე გერმანელ ალექსანდრ ზვერევს ეთამაშება.

ცნობისთვის, 22 წლის ზვერევი ATP-ს ლაივ რეიტინგში 3915 ქულით მე-6 ადგილზეა, ნიკა კი, 2020 ქულით მისთვის სარეკორდო მე-16 პოზიციას იკავებს, ხოლო დღევანდელი წარმატების შემთხვევაში, მე-15 საფეხურზე აინაცვლებს.
ქართველი და გერმანელი ჩოგბურთელები ერთმანეთს 3-ჯერ შეხვედრიან და მინიმალური უპირატესობა საშას მხარესაა, თუმცა კი, ბოლო შეხვედრა ჩვენებურმა მოიგო. ეს, სულ მცირე ხნის წინ, გერმანიის ქალაქ ჰამბურგში მოხდა, სადაც ნახევარფინალურ ეტაპზე ნიკოლოზმა 6:4, 4:6, 7:6 (7:5) მოიგო და მოგვიანებით იქ ზედიზედ მე-2 ტიტული დაისაკუთრა.
მანამდე, 2015 წელს, მარსელის (საფრანგეთი) ტურნირის კვალიფიკაციაში, ზვერევმა ბასილაშვილს 7:6 (7:5), 6:3 სძლია, შარშან, შანხაის (ჩინეთის) მასტერსის საწყის რაუნდში კი მანვე 6:4, 4:6, 7:6 (7:5) მოიგო.
ბასილაშვილისა და ზვერევის დღევანდელი შერკინება კორტ Banque Nationale-ზე გახლავთ დანიშნული და მე-2 წყებაში, რუსი დანიილ მედვედევისა და ჩილელი კრისტიან გარინის მატჩის დასრულების შემდეგ აიღებს სტარტს, ეს კი, თბილისის დროით, დაახლოებით, 22:30 საათზე იქნება.
ცნობისთვის, დღეს დილით ნიკამ ძალები მონრეალის მასტერსის წყვილთა თანრიგშიც სცადა, თუმცა, წარმატებას ვერ მიაღწია. ის და გერმანელი იან-ლენარდ შტრუფი, ვისაც ჩვენებურმა ერთეულთა შეჯიბრის მე-2 წრეში სძლია, ბრიტანელ კაილ ედმუნდთანა და ამერიკელ ტეილორ ფრიცთან 3:6, 4:6 დამარცხდნენ.