უკრაინის საფეხბურთი პრემიერლიგაში მოასპარეზე მარიუპოლის “ილიჩევეცის” მთავარმა მწვრთნელმა ნიკოლაი პავლოვმა “სპორტ-ექსპრეს ვ უკრაინესთან” ინტერვიუში განაცხადა, რომ გუნდის ქართველი ლეგიონერი დავით თარგამაძე ისე უნდა მოიქცეს, როგორც საჭიროდ მიიჩნევს.

აღმოსავლეთ უკრაინაში მიმდინარე საბრძოლო მოქმედებების გამო, თარგამაძე 7 სექტემბერს ევრო-2016-ის შესარჩევ ციკლში ირლანდიასთან ჩატარებული მატჩის შემდეგ უკრაინაში არ ჩადიოდა. “მსოფლიო სპორტთან” საუბარში მან განაცხადა, რომ სიცოცხლით გარისკვა არ სურდა და კლუბში არგამოცხადების მიზეზი ეს იყო.

პავლოვის თქმით, კიევში ჩასულმა თარგამაძემ დაურეკა და უთხრა, რომ უკრაინაში მშობლებმა არ გაუშვეს. მისი განცხადებით, ფეხბურთელს ურჩია, რომ საკუთარი პრობლემები თავად მოაგვაროს. მწვრთნელმა აღნიშნა, რომ თარგამაძის ბედი დონეცკის “შახტარის” ხელშია, რომელსაც ფეხბურთელის სატრანსფერო უფლებები ეკუთვნის. მან ისიც დასძინა, რომ თარგამაძის ამჟამინდელი ადგილსამყოფელი არ იცის.