ფეხბურთი

21:40 | 29.07.2019 | ნანახია [] - ჯერ

ნენად ბიელიცა: "საბურთალოს" სივრცეები არ უნდა დავუტოვოთ"

ზაგრების „დინამოს“ მთავარმა მწვრთნელმა ნენად ბიელიცამ ჩემპიონთა ლიგის მეორე საკვალიფიკაციო ეტაპზე „საბურთალოსთან“ მატჩისწინ პრესკონფერენცია გამართა. ხორვატი სპეციალისტის განცხადებით, მისი გუნდი მზადაა და კონცენტრირებულია ხვალინდელი მატჩისთვის.

თუმცა, ბიელიცა იქვე დასძენს, რომ „საბურთალო“ კარგი გუნდია და სივრცეები არ უნდა დაუტოვონ:

„მზად ვართ და გვჯერა საკუთარი თავის. 20-ზე მეტი ფეხბურთელი მზადაა, რაც იმას ნიშნავს, რომ სასიამოვნო თავის ტკივილი გვაქვს, ვინ მოხვდება 18 კაცში და შემდეგ ძირითად შემადგენლობაში. ეს ფეხბურთელების დამსახურებაა, რადგან ყველა მათგანმა, ვინც აქამდე ითამაშა, ჩემი მოლოდინი გაამართლა. კარგ ფორმაში ვართ, სრულ კონცენტრაციას ვახდენთ ხვალინდელ თამაშზე და ასე იქნება პირველიდან ბოლო წუთამდე. „საბურთალო“ კარგი გუნდია და ვიცით, რომ სივრცეებს თუ მივცემთ, მისი გამოყენება შეუძლია.

მთავარია, რომ მაქსიმალურ დონეზე ვიმყოფებით. მინდა, ფეხბურთელები საქმეს სერიოზულად და კონცენტრაციით მიუდგნენ. უნდა ვითამაშოთ ისე, როგორც აქამდე ჩატარებულ ოთხივე მატჩში. სამწუხაროა, რომ ცარიელი ტრიბუნების წინაშე მოგვიწევს თამაში. თუმცა, ყველა შემთხვევაში გამარჯვება ჩვენს რწმენას გააძლიერებს მომდევო მატჩებისთვის.

დანი ოლმო და ფრანსუა მუბანჯე? ორივე ითამაშებს, თუმცა არ ვიცი რა დროით. ეს თამაშის მიმდინარეობაზე იქნება დამოკიდებული. ჩვენ გვაქვს გეგმა ამასთან დაკავშირებით და ვნახოთ. გუნდი მზადაა, მაგრამ რამდენიმე ტრავმირებული ფეხბურთელი მაინც გვყავს. ჩემს განკარგულებაში 24-25 ფეხბურთელია, რაც ჩემთვის დიდი ფუფუნებაა“, - თქვა ბიელიცამ.

შეგახსენებთ, ზაგრების „დინამოსა“ და „საბურთალოს“ შეხვედრა 30 ივლისს, თბილისის დროით 22:00 საათზე დაიწყება. პირველი მატჩი თბილისში ხორვტიის ჩემპიონმა 2:0 მოიგო და წყვილში გამოკვეთილი ფავორიტია.

0.154926