გერმანიის დიდი პრიზი მე-200 რბოლაა, რომელსაც „მერსედესი“ ფორმულა 1-ში ჩაატარებს. და ამ რბოლის მოწინავე პოზიციას გერმანული გუნდის ლიდერი, ლუის ჰამილტონი დაიკავებს. სამქიმიანებისგან განსხვავებით, იღბალმა ზურგი აქცია მათ მთავარ მეტოქე „ფერარის“, რომელსაც ტექნიკურმა პრობლემებმა, მოწინავე პოზიციებისთვის ბრძოლის საშუალებაც კი არ მისცა.
ჰამილტონი დილიდან თავს შეუძლოდ გრძნობდა და იყო დიდი შანსი იმისა, რომ ის სარეზერვო პილოტ ესტებან ოკონს შეეცვალა. მსოფლიოს ხუთგზის ჩემპიონს ყელი ჰქონია გაციებული. ამის მიუხედავად, მესამე თავისუფალ პრაქტიკაზე მაინც გამოვიდა და სწორედ მისი დასრულების შემდეგ გადაწყდა, რომ კვალიფიკაციას და მასთან ერთად რბოლასაც, არ გააცდენდა.
გერმანიაში ამჟამად ძლიერი სიცხეა, რაც „მერსედესს“ არასახარბიელო მდგომრეობას უქმნის - სამქიმიანების სუსტი წერტილი, გაგრილების სისტემაა, რომელიც ჰაერის მაღალი ტემპერატურის პირობბში, დატვირთვას ვერ უძლებს. ამის გამო, გუნდს აგრეგატის დაზოგვა უწევს და მას სრული დატვირთვით არ ამუშავებს. ამის მიუხედავად, ჰამილტონმა ბოლო ცდაზე გააკეთა ის, რასაც მისგან ყველა მიჩვეულია. მან თითქმის ნახევარი წამით აჯობა მეორე უსწრაფეს მაქს ფერსტაპენს. მომდევნო საუკეთესო დროები კი ვალტერი ბოტასმა და პიერ გასლიმ დააფიქსირეს. ამგვარად, სტარტზე პირველ ოთხ პოზიციას, ჭადრაკული განლაგებით, „მერსედესის“ და „რედ ბულის“ პილოტები დაიკავებენ.
ათეულში მხოლოდ ერთი ფერარი მოხვდა და ისიც, მხოლოდ მე-10 პოზიციაზე, რომელსაც შარლ ლეკლერი დაიკავებს. მას კვალიფიკაციის მესამე ნწილში, ტრასაზე გამოსვლის საშუალებაც არ მიეცა - მანქანას საწვავის სისტემა დაუზიანდა. კვალიფიკაციის დასაწყისში კი, ასევე ტრასაზე გამოუსვლელად, რბოლას სებასტიან ფეტელი გამოეთიშა, რომლის მანქანის ძალურ დანადგარზეც ტურბო სისტემა დაზიანდა.
„ლუის, ტოტო ვარ, შენ ყოველთვის გვაოცებ“, - რადიოთი მიმართა გამარჯვებულს გუნდის შეფმა ტოტო ვოლფმა, ვინც გუნდთან ერთად, ძველ ავტოსპორტულ ფორმაშია გამოწყობილი. მე-200 რბოლის გარდა, „მერსედესი“ ავტოსპორტში თავისი გამოსვლების 125 წლის იუბილესაც აღნიშნავს.
„წარმოდგენა არ მაქვს, ეს როგორ შევძელით და წარმოდგენა არ მაქვს, ფერარის რა დაემართა. ეს ჩვენთვის მეტად მნიშვნელოვანი, მეორე საშინაო რბოლაა. ჩვენ მოტორსპორტში 125-ე სეზონს ვატარებთ და კარგია, რომ ასე აღვნიშნავთ“, - განაცხადა ჰამილტონმა, ვინც კარიერაში 87-ე კვალიფიკაცია მოიგო.
გერმანიის დიდი პრიზი
კვალიფიკაცია
- ლუის ჰამილტონი (ბრიტანეთი, მერსედესი) 1:11.767
- მაქს ფერსტაპენი (ჰოლანდია, რედ ბული) 1:12.113
- ვალტერი ბოტასი (ფინეთი, მერსედესი) 1:12.129
- პიერ გასლი (საფრანგეთი, რედ ბული) 1:12.522
- კიმი რაიკონენი (ფინეთი, ალფა რომეო) 1:12.538
- რომენ გროჟანი (საფრანგეთი, ჰაასი) 1:12.851
- კარლოს საინსი (ესპანეთი, მაკლარენი) 1:12.897
- სერხიო პერესი (მექსიკა, რეისინგ პოინტი) 1:13.065
- ნიკო ჰულკენბერგი (გერმანია, რენო) 1:13.126
- შარლ ლეკლერი (მონაკო, ფერარი) დროის გარეშე
- ანტონიო ჯოვინაცი (იტალია, ალფა რომეო) 1:12.786
- კევინ მაგნუსენი (დანია, ჰაასი) 1:12.789
- დანიელ რიკარდო (ავსტრალია, რენო) 1:12.799
- დანიილ კვიატი (რუსეთი, ტორო როსო) 1:13.135
- ლანს სტროლი (კანადა, რეისინგ პოინტი) 1:13.450
- ლანდო ნორისი (ბრიტანეთი, მაკლარენი) 1:13.333
- ალექს ალბონი (ტაილანდი, ტორო როსო) 1:13.461
- ჯორჯ რასელი (ბრიტანეთი, უილიამსი) 1:14.721
- რობერტ კუბიცა (პოლონეთი, უილიამსი) 1:14.839
- სებასტიან ფეტელი (გერმანია, ფერარი) დროის გარეშე
