ავტოსპორტი

13:56 | 12.07.2019 | ნანახია [] - ჯერ

„მაკლარენმა“ ორივე პილოტი დაიტოვა

ბრიტანეთის დიდი პრიზის წინ, „მაკლარენმა“ გამოაცხადა, რომ ფორმულა 1-ში გამარჯვების გზაზე დაბრუნებას უახლოეს მომავალში გეგმავს და რომ ამ მიმართულებით, მთავარ ფაქტორებად, დაწყებული საქმის გაგრძელებას და სტაბილურობას მიიჩნევს. ამისათვის კი საჭიროდ ჩათვალა, რომ ორივე პილოტი - ესპანელი კარლოს საინსი და ბრიტანელი ლანდო ნორისი შეინარჩუნოს.

ორივე პილოტი გუნდში გასული სეზონის შემდეგ მოვიდა. საინსი „რენოდან“ გადმოვიდა და უოკინგელებთან მრავალწლიანი კონტრაქტი აქვს გაფორმებული. ნორისი კი ფორმულა 1-ში ახალბედაა. გასულ სეზონში მან ფორმულა 2-ის ჩემპიონატში მეორე ადგილი დაიკავა.

„ჩვენ განვიტარებას ვაგრძელებთ. კარლოსი და ლანდო ჩვენი პროგრესის განუყოფელი ნაწილია. მათთან მუშაობა, ინჟინრებს MCL34-ის სრულყოფაში და MCL35-ის მონახაზების მომზადებაში ეხმარება. განსაკუთრებით ფასეულია კარლოსის როლი მანქანის განვითარებაში. ლანდო კი საოცრად სწრაფად ვითარდება და სულ უფრო მეტად თავდაჯერებულია“, - ამბობს გუნდის შეფი ანდრეას ზიდლი.

ბრიტანულ გუნდს კონსტრუქტორთა ჩემპიონატში ამჟამად მეოთხე ადგილი უკავია და 20 ქულას უგებს უახლოეს მდევარ „რენოს“. მრბოლთა ჩემპიონატში საინსი 30 ქულით მე-7 ადგილზეა, ნორისს კი 22 ქულა აქვს და მე-8 ადგილი უკავია. შედარებისთვის, საინსმა გასული სეზონი „რენოსთან“ ერთად, 53 ქულით, მე-8 ადგილზე დაასრულა.

0.149737