30 ივნისიდან 7 ივლისის ჩათვლით გერმანიის ქალაქ ფრანკფურტში ფიგურულ ციგურაობაში არბიტრების, ტექნიკური კონტროლიორებისა და ტექნიკური სპეციალისტებისათვის რე-სერტიფიცირების და მსაჯობის კანდიდატებისათვის საერთაშორისო კატეგორიის მსაჯის სტატუსის მისანიჭებელი გამოცდები ჩატარდა.

გამოცდებს საერთშორისო საციგურაო კავშირის ეგიდით ორგანიზებას უწევდა ტექნიკური კომიტეტის ოფიციალური პირები.
გამოცდები ორი, თეორიული და პრაქტიკული ნაწილებისაგან შედგებოდა და კანდიდატებისაგან საკმაოდ რთული და სტრუქტურიზებული სტანდარტის დაკმაყოფილებას ითხოვდა .
გამოცდების შედეგების მიხედვით, ერთეულთა და სპორტული წყვილების კატეგორიაში (92 % თეორიულ და 99% ელემენტების იდენტიფიცირებისა და კომპონენტების შეფასების ნაწილში) საერთაშორისო კატეგორიის მსაჯის სტატუსი (international judge) მიენიჭა იულია ლევშუნოვას, რომელიც საქართველოს სახელით იმსაჯებს საერთაშორისო დონის ტურნირებს.
საქართველოს ფიგურული ციგურაობის ფედერაცია ულოცავს ახალგაზრდა და პერსპექტიულ მსაჯს იულია ლევშუნოვას ამ წარმატებულ შედეგს და გამოთქვამს იმედს, რომ საკმაოდ გამოცდილ საერთაშორისო კატეგორიის (ISU judge) ქართველ მსაჯ სალომე ჩიგოგიძესთან ერთად ქართველ მოციგურავეთა ინტერესებს ობიექტურად დაიცავს. ეს, ძალიან მნიშვნელოვანია ქართველ სპორტსმენთა მოტივაციისა და მომავალ საერთაშორისო ტურნირებზე მაღალი სპორტული შედეგების მისაღწევად.

საქართველოს ფიგურული ციგურაობის ფედერაციის პრესსამსახური