27 წლის ქართველი ჩოგბურთელი ნიკოლოზ ბასილაშვილი უიმბლდონის 2019 წლის გათამაშებას მე-2 წრეში გამოეთიშა.

ის, რომ ნიკა ცუდ ფორმაში იმყოფება, დღევანდელ მატჩშიც გამოჩნდა. საქართველოს პირველი ჩოგანს აურაცხელი უნებლიე შეცდომა ჰქონდა, ბრიტანელი დანიელ ევანსის სათამაშო სტილსაც ალღო ვერაფრით აუღო და 3:6, 2:6, 6:7 (2:7) დამარცხდა.
საინტერესოა, რომ მე-3 სეტში ნიკოლოზმა 4 მატჩ-პოინტი გადაარჩინა და საქმე ტაი-ბრეიკამდე მიიყვანა, თუმცა, იქ ისეთი შეცდომები დაუშვა, დამწყებ ჩოგბურთელს რომ არ ეპატიება და მთელი გარჯა წყალში ჩაყარა.
განვლილ მატჩში, რომელიც ორსაათნახევარს გაგრძელდა, ბასილაშვილს 3 ეისი და 7 ორმაგი შეცდომა მოუგროვდა, მეტოქეს კი, შესაბამისად, 5 და 3.
ნიკოლოზს პირველ მოწოდებაზე 65%-ანი მაჩვენებელი ჰქონდა, საიდანაც სათავისოდ მხოლოდ 59% (42 71-დან) დაასრულა, მე-2 მოწოდებაზე კი 44%-ანი შედეგი (17 39-დან) აღმოაჩნდა.
ქართველმა ჩოგბურთელმა 8-დან 2 ბრეიკ-პოინტი გამოიყენა, თავად კი მოწოდება 6-ჯერ დათმო (ევანსის აქტივში 11 ბრეიკ-პოინტი გახლდათ).
და ყველაზე თვალშისაცემი: ნიკოლოზმა 48 (!) უნებლიე შეცდომა დაუშვა, როდესაც ბრიტანელს მხოლოდ 15 ჰქონდა, “ვინერსებში” კი ჩვენებურმა 32:23 იმარჯვა.
შეგახსენებთ, რომ უიმბლდონის პირველ წრეში ბასილაშვილმა კიდევ ერთ ბრიტანელ ჯეიმს უორდს 2:6, 4:6, 6:4, 6:4, 8:6 სძლია და ამ დროისთვის, ATP-ს “ლაივ-რეიტინგში” 1995 ქულით მე-15 ადგილზე იმყოფება, რაც მის კარიერაში საუკეთესო მაჩვენებელია.