ქართველი ნიჩბოსანი ზაზა ნადირაძე, რომელიც ბელარუსის დედაქალაქ მინსკში მიმდინარე მეორე ევროპულ თამაშებზე კანოეთი 200 მეტრზე შეჯიბრში უმთავრეს ფავორიტად მოიაზრებოდა, მედლის გარეშე დარჩა.

შეგახსენებთ, რომ ნადირაძე ფინალში პირველი შედეგით გავიდა, იქ კი, მხოლოდ მე-4 ადგილზე აღმოჩნდა. საინტერესოა, რომ კვალიფიკაციაში ზაზამ დისტანცია 39.421 წამში დაფარა, ხოლო ამჯერად, მისი დრო 44.955 წამი იყო, რაც აღნიშნული დისტანციისთვის უდიდესი სხვაობაა. ჩემპიონის ტიტული ბელარუსმა არწიომ კოზირმა (42.835) მოიპოვა.
დღეს, მეტად იყოჩაღა ბადრი ყაველაშვილმა, რომელმაც კაიაკით 200 მეტრზე შეჯიბრის მცირე ფინალში პირველი შედეგი დააფიქსირა. ქართველმა ნიჩბოსანმა დისტანცია 38.095 წამში დაფარა, მეორე გერმანელი ტიმო ჰასელეუ (38.246) იყო, მესამე კი – პოლონელი პაველ კაჩმარი (38.304).
ერთი საინტერესო ფაქტიც. ყაველაშვილს მონაწილეობა მთავარ ფინალში რომ მიეღო, აღნიშნული შედეგით, ის ოქროს მედლის მფლობელი ხდებოდა. ევროპის მეორე თამაშების ჩემპიონმა – ფრანგმა მაქსიმ ბომონტმა დისტანცია 38.976 წამში გაიარა.
ნიჩბოსნობის ტურნირზე ფინალში კიდევ ერთი მონაწილე გვყავდა, თუმცა, კვარცხლბეკზე ასვლა ვერც მან მოახერხა. ქალთა შორის კანოეთი 200 მეტრზე შეჯიბრში მარიამ ქერდიკაშვილი (54.691 წამი) 9 მონაწილეს შორის მე-8 პოზიციაზე გავიდა, ჩემპიონი კი ბელარუსი ალიონა ნაზდროვა (50.351) გახდა.