ჭიდაობა

14:45 | 26.06.2019 | ნანახია [] - ჯერ

ხინჩეგაშვილი ნახევარფინალშია, ოდიკაძე ბრინჯაოს შანსს ელოდება

საქართველოს თავისუფალი სტილით მოჭიდავეთა ნაკრების წევრი ვლადიმერ ხინჩეგაშვილი (65 კგ) მინსკში მიმდინარე ევროპულ თამაშებზე ნახევარფინალში გავიდა. ელიზბარ ოდიკაძემ (97 კგ) კი ძირითად ბადეში გამოსვლა მეოთხედფინალში დაასრულა და ბრინჯაოს მედლისთვის ბრძოლის გაგრძელების შანსს ელოდება.

ხინჩეგაშვილი საქმეში პირდაპირ მეოთხედფინალიდან ჩაერთო და მოლდოველ ანდრეი პერპელიცას 4:1 სძლია. ნახევარფინალში კი რუსეთის ნაკრების წევრ ახმედ ჩაკაევს დაუპირისპირდება.

ოდიკაძემ შეჯიბრება სომეხი სარგის ჰოვსეპიანის ძლევით (13:2) გახსნა. აზერბაიჯანელ ნურმაგომედ გაჯიევთან კი ვეღარას გახდა (3:7) და რეპეშაჟში მხოლოდ იმ შემთხვევაში გადაერთვება, თუ გაჯიევი ნახევარფინალში უკრაინის ნაკრების წევრ მურაზ მჭედლიძეს აჯობებს.

დღესვე გააგრძელა ბრინჯაოს მედლისთვის ბრძოლა ლაშა ლომთაძემ (57 კგ), მაგრამ რეპეშაჟის ნახევარფინალში დამარცხდა თურქ სულეიმან ატლისთან (0:6) და ევროპულ თამაშებს გამოეთიშა.

ნახევარფინალები თბილისის დროით 19:00 საათიდან დაიწყება. შემდეგ კი საპრიზო სამეულებიც შეივსება, ოღონდ იმ ხუთ წონით კატეგორიაში, რომლებშიც წინასწარი ეტაპისა და ნახევარფინალური ბრძოლები გუშინ ჩატარდა. საქართველოს ნაკრები დღეს საუკეთესო შემთხვევაში ოქროსა და ბრინჯაოს თითო მედალს მოიპოვებს.

125 კილოგრამ წონით კატეგორიაში გივი მაჭარაშვილი ფინალში რუსეთის ნაკრების წევრ ანზორ ხიზრიევს დაეჭიდება. 74 კილოგრამში კი ავთანდილ კენჭაძე რეპეშაჟის ფინალში გავა ხალიჩაზე და მეტოქედ ბელარუსი აზამატ ნურიკაუ ეყოლება.

0.159088