25 ივნისს, ბათუმის “რაგბი არენაზე” “კოკა-კოლას თასი 2019”-ის ბიჭების გათამაშების დასკვნითი მატჩები გაიმართა.

2019 წლის გათამაშების ფინალურ შეხვედრაში ერთმანეთის წინააღდეგ აფხაზეთის მე-15 და თბილისი 39-ე საჯარო სკოლები წარსდგნენ. უძლიერესი გუნდის ტიტულის მოპოვების შანსი ორივე გუნდს ჰქონდა, მაგრამ მე-15 სკოლის გუნდმა შანსები უკეთ გამოიყენა და 2:0 დაამარცხა მეტოქე. მესამე ადგილისთვის ერთმანეთს ბოლნისისა და ახმეტის პირველი საჯარო სკოლები დაუპირისპირდნენ. დაძაბული მატჩი ორმხრივი შეტევებით წარიმართა და ბოლნისელთა გამარჯვებით 3:1 დასრულდა.

მატჩების დასრულების შემდეგ საზეიმო ცერემონია გაიმართა. გუნდებს და მოთამაშეებს კუთვნილი თასები, მედლები და ინდივიდუალური ჯილდოები საქართველოს ფეხბურთის ფედერაციის გენერალურმა მდივანმა, დავით მუჯირმა და ვიცე-პრეზიდენტმა, ალექსანდრე იაშვილმა გადასცეს. აღნიშნულ პრიზებთან ერთად გუნდებს კოკა-კოლას სამახსოვრო საჩუქრები და მაკდონალდსის ვაუჩერები გადაეცათ.

საქართველოს ფეხბურთის ფედერაციის გენერალურმა მდივანმა, დავით მუჯირმა ფინალურ შეხვედრაზე დამსწრე საზოგადოებას სიტყვით მიმართა:

“საქართველოს ფეხბურთის ფედერაციისა და “კოკა-კოლას” საერთო პროექტს წელს 25 წლის იუბილე აქვს. ძალიან სასიამოვნოა, რომ 2019 წლის გათამაშება მონაწილეთა რაოდენობით უპრეცენდენტო გამოდგა. “კოკა-კოლას თასი 2019”-ში მთელი ქვეყნის მასშტაბით მონაწილეობა 1089-მა გუნდმა მიიღო. აღსანიშნავია, რომ აქედან 250-მდე გოგონათა გუნდია.

მსურს მადლობა გადავუხადო “კოკა-კოლას”, რადგან უკვე 25 წელია ქართული ფეხბურთს ეხმარება და ბავშვთა ფეხბურთის განვითარებაზე აქტიურად ზრუნავს.

აქვე მსრუს წლევანდელი სეზონის გამარჯვებულს, აფხაზეთის მე-15 საჯარო სკოლის გუნდს მივულოცო და გუნდის თითოეულ მოთამაშეს წარმატებული საფეხბურთო კარიერა ვუსურვო. მომავალ წლებში “კოკა-კოლას თასი” აუცილებლად გაგრძელდება და იმედი მაქვს, რომ ტურნირში კიდევ უფრო მეტი ბავშვი მიიღებს მონაწილეობას.” - განაცხადა დავით მუჯირმა.

“კოკა-კოლას თასი 2019”-ის გოგონათა გათამაშების ფინალური შეხვედრა ასევე ბათუმში 20 ივნისს გაიმართა. უძლიერესი გუნდის ტიტული ზემო ალვანის პირველმა საჯარო სკოლამ მოიპოვა. ალვანელებმა ფინალურ შეხვედრაში თბილისი 146-ე საჯარო სკოლა ანგარიშით - 4:0 დაამარცხა.

“კოკა-კოლას თასის” წლევანდელ გათამაშებაში, მთელი ქვეყნის მასშტაბით, მონაწილეობა 1089 სკოლის 13 ათასზე მეტმა მოსწავლემ მიიღო. საბოლოოდ, ფინალურ ეტაპზე თამაშის უფლება ვაჟთა შორის 16-მა საუკეთესო გუნდმა მოიპოვა, გოგონათა შორის კი, გამარჯვებული 12 გუნდს შორის გამოვლინდა.

www.gff.ge