სახილ ალახვერდოვი (49 კგ.) პირველი ქართველი მოკრივე გახდა, რომელმაც ბელარუსის დედაქალაქ მინსკში მიმდინარე მეორე ევროპული თამაშებზე მედალი გაინაღდა.

ალახვერდოვმა გერმანელი ომარ სალაჰ იბრაჰიმი და ბრიტანელი აჰმედ აქეელი ერთნაირი ანგარიშით (3:2) დაჯაბნა და 28 ივნისს, ნახევარფინალში იტალიელ ფედერიკო სერას გაეჯიბრება, რაც იმას ნიშნავს, რომ მინიმუმ ბრინჯაოს აიღებს.
ტურნირზე ასპარეზობას კიდევ 4 ქართველი მოკრივე აგრძელებს. ნოდარ დარბაიძემ (52 კგ.) მერვედფინალში რუმინელ მარიან-გაბრიელ შიოპუს 5:0 სძლია და ხვალ, მეოთხედფინალში იტალიელ მანუელ ჩაპაისთან დაპირისპირება ელის.
არწიუშ გომციანმა (56 კგ.) პოლონელ იაროსლავ ივანოვსა და რუს ბახტოვარ ნაზიროვს ერთნაირი ანგარიშით – 5:0 მოუგო, ხვალ კი, მეოთხედფინალში გერმანელ შარაფა რამანს შეეჯიბრება.
ოთარ ერანოსიანი (60 კგ.) ევროპულ თამაშებში მერვედფინალიდან ჩაება, სადაც ფრანგი ჯორდან როდრიგესს 5:0 მოუგო, ხოლო მეოთხედფინალში აზერბაიჯანელი ჯავიდ ჩალაბიევის პირისპირ დადგება.
მიხეილ ბახტიძემ (+91 კგ.) უნგრელ იშტვან ბენჩე ნაგისა (5:0) და ირლანდიელ დინ გარდინერს (4:1) აჯობა, 26 ივნისს კი, მეოთხედფინალში ხორვატ მარკო მილუნს დაუპირისპირდება.
ლაშა გურულმა (64 კგ.) რუმინელ დმიტრი გალაგოტთან მოგებას (4:1) თურქ თურგულჰან ერდემირთან მარცხი (1:4) მიაყოლა.
ესკერჰან მადიევი (69 კგ.) ბრძოლაში მე-2 რაუნდიდან ჩაება, სადაც ნორვეგიელ ჰადი სროურს 4:1 სძლია, ხოლო მერვედფინალში რუს ხარიტონ აგრბასთან 0:5 დამარცხდა.
გიორგი ხარაბაძემ (75 კგ.) სერბი მილოსავ სავიჩს 5:0 მოუგო, მე-2 წრეში კი აზერბაიჯანელ კამრან შახსუვარლისთან 1:4 წააგო.
გიორგი მანჯავიძე (81 კგ.) საწყის წრეშივე დამარცხდა შვეიცარიელ უკე სმაილისთან 2:3 დამარცხდა.
ნიკოლოზ ბეგაძემ (91 კგ.) ლუქსემბურგელ მიშელ ერპელდინგს 5:0 სძლია, უკრაინელი რამაზან მუსლიმოვი 4:1 დაამარცხა, მეოთხედფინალში კი ბელარუს ვლადისლაუ სმიაჰლუკაუსთან 2:3 წააგო.