თბილისში მიმდინარე მოვლენებსა და საპროტესტო აქციებს უკვალოდ არც ქართულ სპორტში ჩაუვლია. კონკრეტულმა სპორტსმენებმა აქციაზე დაშავებულ ადამიანებს სოლიდარობა გამოუცხადეს, საფეხბურთო კლუბებმა და გულშემატკივრებმა კი კიდევ ერთხელ გააჟღერეს სლოგანი - რუსეთი ოკუპანტია!

საქართველოს 20 წლამდე მორაგბეთა ნაკრების ლიდერმა თედო აბჟანდაძემ იტალიას მატჩში გატანილი გარდასახვის შემდეგ ხელი თვალზე აიფარა. ქართველმა მორაგბემ ამ ჟესტით ორი დღის წინ თბილისში დარბეული აქციის მიმართ სოლიდარობა გამოხატა.

იგივე ჟესტით გამოირჩნენ თბილისის „ლოკომოტივის“ ფეხბურთელები ოთარ კობახიძე და დავით ჯიქია. „ლოკოს“ წევრებმა ირაკლი სიხარულიძის გოლის შემდეგ თვალზე ხელი აიფარეს და დაშავებულების მიმართ მხარდაჭერა გამოხატეს.

გარდა ამისა, მატჩამდე „ლოკომოტივის“ ფეხბურთელები მოედანზე სპეციალურად დამზადებული მაისურებით გავიდნენ, რომელზეც წარწერასთან ერთად საქართველოს რუკა იყო დატანილი: „მახსოვს, რომ საქართველოს 20% ოკუპირებულია“.

იგივე გზავნილით გამოირჩა ქუთაისის „ტორპედო“ - იმერული გუნდის მაისურს რუკასთან ერთად ეწერა: „ჩვენ საქართველოდან ვართ და ჩვენი ქვეყანა რუსეთის მიერ ოკუპირებულია“.

თბილისის „საბურთალოსა“ და ბათუმის „დინამოს“ შეხვედრაში კი, აჭარული გუნდის გულშემატკივრებმა ტრიბუნებზე ბანერი გამოფინეს - „ღრუსეთი ოკუპანტია!“