ბულგარეთის ქალაქ რაზგრადში სტარტი აიღო VIVACOM CUP გათამაშებამ, რომელშიც მონაწილეობას თბილისის "დინამოს" აკადემიის 14 წლამდელთა გუნდიც იღებს.

ორჯგუფიან ტურნირში თბილისელთა მეტოქეები (B ჯგუფი) სერბული "ვოივოდინა" და უკრაინული "ჩერნომორეცი არიან", A ჯგუფში მასპინძელ "ლუდოგორეცთან ერთად კი, თავი მაკედონიურმა "რაბოტნიჩკიმ" და რუმინულმა "უნივერსიტატეამ" მოიყარეს. ტროფეის ჯგუფში პირველ ადგილზე გასული გუნდები გაითამაშებენ. დინამოელთა პრესსამსახურის ცნობით, ქართველი ჭაბუკები პირველ ტურში "ვოივოდინას" დაუპირისპირდნენ და სერბული გუნდი 4:2 დაამარცხეს. დუბლი ნიკა ნინიძემ შეასრულა, თითოჯერ კი თავი გიორგი სურმავამა და ლუკა შეროზიამ გამოიჩინეს. ვასილ გეგუჩაძის გუნდი ჯგუფში მეორე შეხვედრას ოდესის "ჩერნომორეცთან" 13 ივნისს გამართავს, ფინალური შეხვედრები კი 14 ივნისს შედგება.

U14 "დინამო" (თბილისი) - "ვოივოდინა" (ნოვი სადი) 4:2

U14 დინამო: ბაჩილავა, ბუცხრიკიძე, ხარჩილავა, სურმავა, სიგუა, ცეცხლაძე, პარკაძე, ნინიძე, ფარცვანია, გიუნაშვილი, შეროზია.

სათადარიგოები: იობაშვილი, ჩიხრაძე, ჩხიკვაძე, ხორხელი, ბულუხაძე, უკლება, მახარაძე, ჯიქია.