ფეხბურთი

22:50 | 7.06.2019 | ნანახია [] - ჯერ

ვლადიმირ ვაისი: "დანიაში კვირკველია და ხოჭოლავა ვერ დაგვეხმარებიან"

საქართველოს ეროვნულმა ნაკრებმა ევრო 2020-ის შესარჩევ ციკლში პირველი გამარჯვება მოიპოვა და თბილისში გიბრალტარი 3:0 დაამარცხა. ნამატჩევს „ჯვაროსნების“ თავკაცმა ვლადიმირ ვაისმა პრესკონფერენცია გამართა.

სლოვაკი სპეციალისტის განცხადებით, გამარჯვება ყოველთვის მნიშვნელოვანია, თუნდაც ყველაზე დაბალი რეიტინგის მქონე გუნდთან. გარდა ამისა, ვაისმა დააანონსა, რომ დანიასთან მომდევნო მატჩში გუნდს დავით ხოჭოლავა და სოლომონ კვირკველია ვერ დაეხმარებიან.

„ყოველთვის მნიშვნელოვანია საკვალიფიკაციო ეტაპზე სამი ქულის მოპოვება, თუნდაც ყველაზე სუსტი მეტოქის წინააღმდეგ. გვქონდა ბევრი საგოლე მომენტი, მაგრამ ვერ გამოვიყენეთ და შესაძლებელი იყო უფრო უკეთ გვეთამაშა დასკვნით ფაზაში. ჩვენ უკვე დავიწყეთ დანიასთან მატჩისთვის. ჯაბა კანკავამ კი დიდი ჯენტლმენობა გამოიჩინა, როდესაც ახალგაზრდა ვატო არველაძეს მისცა პენალტის დარტყმის შესაძლებლობა და ეს ადასტურებს, რომ ჩვენს გუნდში კარგი ატმოსფეროა.

ზოგადად, ახალი ფეხბურთელებით კმაყოფილი ვარ. მნიშვნელოვანია, როდესაც ფეხბურთელი ნაკრებშია გამოძახებული, უფრო მეტი პასუხისმგებლობით უდგება და ზოგჯერ ვერ ავლენს მაქსიმუმს. ხვიჩა კვარაცხელიას თამაშით კმაყოფილი ვარ, მაგრამ ვიცით, რომ უკეთ თამაშიც შეუძლია. ტრავმის ხარისხი ჯერჯერობით უცნობია, ხვალ ჩაუტარდება სამედიცინო შემოწმება და ამის შემდეგ გაირკვევა იქნება თუ არა ჩვენთან ერთად დანიაში.

ასევე ტრავმირებულია ელგუჯა ლობჯანიძე და მისი თამაშის საკითხი ჯერჯერობით გადაწყვეტილი არაა. შემადგენლობაში ცვლილებები კი იქნება და სავარაუდოდ, 2-3 ცვლილება იქნება. ლორიას რაც შეეხება, ჩვენ ვისაუბრეთ ირლანდიასთან გაშვებული გოლის შემდეგ და დღეს მან აშკარა გოლს გადაგვარჩინა, მისი თამაშით კმაყოფილი ვარ.

რა თქმა უნდა, ამ პერიოდის განმავლობაში ბევრს ვფიქრობდი, რადგან ბევრი ფეხბურთელი გვყავდა ტრავმირებული. დღეს ძირითადად იმ ფეხბურთელებს დავეყრდენი, რომელთაც სათამაშო პრაქტიკა აქვთ კლუბებში. დანიაში ვეცდებით,რომ სწრაფი ფლანგებით ვითამაშოთ, თუმცა შემადგენლობა არ მაქვს გადაწყვეტილი. არაა გამორიცხული, რომ მჭედლიძე სასტარტოში ვიხილოთ. შემიძლია გითხრათ, რომ შიშით არ გავალთ მოედანზე და ეს თამაში მეტ თავდაჯერებულობას მოგვცემს.

მეორე ტაიმში გარკვეული ცვლილებები განხორციელდა, პაპუნაშვილი და კიტეიშვილი თამაშში კარგად ჩაერთვნენ და გუნდს უფრო მეტი შესაძლებლობა ჰქონდა მეტოქის კარისკენ დარტყმისთვის. დანიაში შემადგენლობას რაც შეეხება, ხვალ ვარჯიში გვაქვს, შემდეგ დანიაში გავემგზავრებით და მხოლოდ ამის შემდეგ მივიღებთ გადაწყვეტილებას. ამ თამაშში დაგვჭირდება, როგორც ფიზიკური მომზადება, ისე სისხარტე დაგვჭრდება.

ირლანდიასთან ცოცხალი კედლის დაყენების დროს შეცდომა მართლაც იყო, მაგრამ დღეს მსგავსი არაფერი ყოფილა და ლორიამ კედელი სწორად დააყენა, შესაბამისად გოლი არ გასულა. ხარაიშვილს რაც შეეხება, ვნახოთ, როგორც უკვე ვთქვი შემადგენლობაში ცვლილებები იქნება და ხვალინდელი ვარჯიშის შემდეგ შემადგენლობასთან დაკავშირებით უფრო რეალური სურათი იქნება.

სამწუხაროდ, დანიასთან სოლომონ კვირკველია ტრავმის გამო ვერ ითამაშებს, ეს უკვე გადაწყვეტილია. გრიგალავას თამაში უნდა აღვნიშნო, რომელმაც ძალიან კარგად ითამაშა. ხოჭოლავა და კვირკველია კი, დანიაში ვერ დაგვეხმარებიან“, - თქვა ვაისმა.

შეგახსენებთ, საქართველოს ნაკრები მომდევნო მატჩს 10 ივნისს, კოპენჰაგენში დანიასთან გამართავს.

0.121017