ჭიდაობა

22:02 | 7.06.2019 | ნანახია [] - ჯერ

უიღბლო დღე – ერთი ბრინჯაოს შანსი

საქართველოს თავისუფალი სტილით მოჭიდავეთა ახალგაზრდული ნაკრების წევრი ამირან ვახტანგაშვილი (65 კგ) ესპანეთის ქალაქ პონტევედრაში მიმდინარე ევროპის ჩემპიონატზე ბრინჯაოს მედლისთვის აგრძელებს ბრძოლას. მას შემდეგ, რაც ძირითად ბადეში მისმა მომგებმა - აზერბაიჯანელმა ტურან ბაირამოვმა ნახევარფინალში მოლდოველი ნიკოლაი გრამეზი დაამარცხა, ვახტანგაშვილი რეპეშაჟის ნახევარფინალში გადაერთო, სადაც ხვალ ფრანგ მარუან აჰმედ იეზას დაუპირისპირდება და თუ აჯობებს, `ბრინჯაოს ფინალში” მოლდოველ ნიკოლაი გრამეზს შეხვდება.

დღესვე, კიდევ ოთხ წონით კატეგორიაში გამოვლინდნენ ფინალისტები. საქართველოს სახელით კი ხალიჩაზე გიორგი ნიშნიანიძე (57 კგ), ოთარ ბაგაური (70 კგ), ბაგრატ გაგნიძე (79 კგ) და ელგუჯა ბალანჩივაძე (97 კგ) გავიდნენ.
ნიშნიანიძემ პირველსავე წრეში წააგო უკრაინის ნაკრების წევრ კამილ კერიმოვთან (2:12). ბაგაურმა ევროპირველობა უკრაინელი ანდრეი ნუჰუმანოვის ძლევით (10:0) გახსნა და ჩემპიონატს მერვედფინალიდან გამოეთიშა, თურქ ომერ ფარუკ კაირთან მარცხით (5:8). გაგნიძემ და ბალანჩივაძემაც თითო შეხვედრა მოიგეს, ოღონდ მათ კონტინენტის პირველობაზე გამოსვლა მეოთხედფინალში დაასრულეს. გაგნიძემ ავსტრიელი ბენჯამინ გრეილი ჩამოიშორა (5:4) და ესტონელ ერიკ რეინბოკთან უშანსოდ წააგო (1:11). ბალანჩივაძემ სლოვაკ ვილიამ ოროსს 1:7 ჩამორჩენა შემოუტრიალა და 10:7 დაამარცხა, მაგრამ უნგრელ არტურ ვეგთან ვეღარას გახდა (0:10).
ოთხივე ქართველის მძლეველს თითო ნაბიჯი დააკლდა ფინალამდე.
ფინალური ბლოკის შეხვედრები ხვალ, თბილისის დროით 20:00 საათზე დაიწყება. იქამდე კი დარჩენილ ხუთ წონით კატეგორიაში: 61, 74, 86, 92 და 125 კილოგრამებში გამოვლინდებიან ფინალისტები. საქართველოს სახელით ევროკონკურენციაში დილიდან ჩაებმებიან: გოდერძი ძებისაშვილი (61 კგ), გოგა მამიაური (74 კგ), მირიან მაისურაძე (86 კგ), დავით ქოჩქიანი (92 კგ) და ვასილ ხვისტანი (125 კგ).

Loading...
0.174122