აფრიკის ჩემპიონთა ლიგის ფინალი ტუნისურ „ესპერანსსა“ და მაროკოულ „ვიდადს“ შორის თავიდან გაიმართება. ამის შესახებ აფრიკის კონფედერაციის ვებგვერდი ოფიციალურად იტყობინება.
ფინალური დუელი ორმატჩიანი იყო. პირველი შეხვედრა ფრედ 1:1 დასრულდა მაროკოში, ხოლო საპასუხოს, ტუნისში „ესპერანსი“ 1:0 იგებდა და თამაში 62-ე წუთზე შეწყდა. „ვიდადს“ გოლი უსამართლოდ არ ჩაუთვალეს, ვიდეორეფერი კი, რომელსაც ეპიზოდი უნდა გადაემოწმებინა, გაუმართავად მუშაობდა. შედეგად, VAR-ის გაუმართაობის გამო „ვიდადის“ ფეხბურთელებმა პროტესტი გამოთქვეს და თამაშის გაგრძელებაზე უარი თქვეს.
საბოლოოდ გამარჯვებულად „ესპერანსი“ გამოცხადდა და თასიც საზეიმოდ გადასცეს. თუმცა, როგორც ჩანს, ამაოდ და რამდენიმე დღის შემდეგ გადაწყვეტილება შეიცვალა - ფინალი ნეიტრალური მოედანზე, მაყურებლების გარეშე თავიდან ჩატარდება.
