რუმინულ კლუჟ-ნაპოკაში გამართული ევროპის თასი საქართველოს ძიუდოისტთა ნაკრების ტრიუმფით დასრულდა. დღეს, მედლები დარჩენილ ოთხ წონით კატეგორიაში გათამაშდა და ოთხივე მათგანში ჩემპიონობა ქართველებმა იზეიმეს.

ცხადია, ყველაზე დიდ ინტერესს მსოფლიოს მოქმედი ჩემპიონის გურამ თუშიშვილის (+100 კგ.) ასპარეზობა იწვევდა, რომელიც ტატამს დისკვალიფიკაციის შემდეგ დაუბრუნდა და კვარცხლბეკის უმაღლეს საფეხურზე ისე ავიდა, ხეირიანად ოფლიც არ მოუდენია.
გურამმა საჩემპიონო გზაზე 3 მეტოქის დაჯაბვნას ჯამში სამიოდ წუთი მოანდომა. ჩვენებურმა ჯერ რუმინელი ბოტონდ კონჩი დააიპონა, შემდეგ კი, უკრაინელი ფედორ პანკო და მირჩეა კროიტორუ.
81 კგ-მდე წონით კატეგორიაში პირველობა არავის დაუთმო ვლადიმერ ახალკაცმა, რომელსაც ერთბაშად 6 ორთაბრძოლის ჩატარება მოუხდა და ყველა მათგანში ასევე იპონით იმარჯვა.
ქართველმა ძიუდოისტმა უნგრელ ფერენც ტოტს, კვიპროსელ ფედიას კონარისს, უკრაინელ ბოჰდან ზუსკოს, შვეიცარიელ ლუკას ვიტვერს, პორტუგალიელ მიგელ ალვეშსა და დიდი ბრიტანეთის წარმომადგენელ სტუარტ მაკვოტს აჯობა.
90 კგ-ში საქართველოს ღირსებას 2 ძიუდოისტი იცავდა და უმედლოდ არცერთი დარჩენილა: ლაშა ბექაური ოქროს დაეუფლა, იმედა გოგოლაძე კი – ბრინჯაოს.
ბექაურმა იტალიელ მატეო მარკონჩინის, უკრაინელ ვიკტორ მაკუხასა და ბრიტანელ მაქს სტიუარტს იპონებით სძლია, ფინალში კი ბელგიელ იოახიმ ბოტიეს ვაზარი აკმარა.
გოგოლაძემ ესპანელი მარკ ბრაუ საბატერი და ავსტრიელი სებასტიან შნეიდერი დააიპონა, მეოთხედფინალში კი ხსენებულ ბოტიესთან ვაზარით დამარცხდა.
იმედამ რეპეშაჟში მიროსლავ ბლაჰუსიაკს იპონით სძლია და შემდეგ ასევე მოუგო ზემოაღნიშნულ სტიუარტს.
100 კგ-მდე წონით კატეგორიაში ჩინებულად იასპარეზა ონისე სანებლიძემ, რომელმაც ოთხივე მეტოქეს იპონებით აჯობა და ჯამში მათ 5 წუთიც არ დაახარჯა.
სანებლიძემ საჩემპიონო გზაზე რუმინელი იონუც ვასიანი, ჰოლანდიელი ფერდინანდ ანსა და უნგრელები – ზალან ოჰატი და მიკლოშ სირენიკსი გაიარა.
საქართველოს ნაკრებმა ჯამში 4 ოქროსა და 2 ბრინჯაოს მედალი მოიპოვა (გუშინ კვარცხლბეკზე ტატიანა ლევიცკა-შუკვანი ავიდა) და გუნდურ ჩათვლაში მხოლოდ იტალიას (4 ოქრო, 3 ვერცხლი) ჩამორჩა, ვაჟებში კი ჩვენებს ბადალი არ ჰყოლიათ.