ქართველ ჩოგბურთელ სოფო შაფათავას, რომელიც ისრაელის დედაქალაქ იერუსალიმში საერთაშორისო ტურნირზე (საპრიზო ფონდი 25 ათასი დოლარი) სათამაშოდ ჩავიდა, საზღვარზე პრობლემები შეექმნა. აღნიშნულის შესახებ ინფორმაციას, სოციალური ქსელის მეშვეობით, თავად შაფათავა ავრცელებს.

“მინდა დავწერო პოსტი, იმიტომ, რომ დიდი ხანია მაწუხებს ის ფაქტი, რომ ჩვენ საზღვარზე აბსოლუტურად ყველას უპრობლემოდ ვატარებთ საქართველოში და ჩვენ ყველგან გვასაზიზღრებენ...
ვთვლი, რომ უსამართლობაა ყველგან ვიზას რომ ვაკეთებთ და ჩვენთან დასეირნობს ყველა სურვილისამებრ.
გუშინ ჩამოვედი ისრაელში.
პროფესიონალი სპორტსმენი. ჩამოვფრინდი შეჯიბრზე, მოგებული შეჯიბრის შემდეგ.
ოფიციალური მოწვევით, სასტუმროთი, უკანა ბილეთით, ხარჯთაღრიცხვით.
6 საათი დამსვეს საზღვარზე.
წაიღეს ჩემი პასპორტი, არც არაფერი მითხრეს რატომ, არც რისთვის. ჩამაგდეს ამოხუთულ ოთახში, არანაირი საკვები ან დასალევი. წყალიც კი არა...
6 საათის მერე ჩვეულებრივი კრიმინალივით დამკითხეს. ისე დამაკავეს გეგონება ამწამს ვიყავი “სროკზე”.
მადლობა ჩემს მეწყვილეს, ემილის, რომელმაც ჩემთან გაათენა და უბრალოდ პრინციპის გამო არ დამტოვა მარტო. და ჩემთან იწვალა. როდესაც შეეძლო 2 წუთში გასულიყო. იმიტომ რომ ბრიტანელია და რა თქმა უნდა ჩვენგან განსხვავებით სდამიანებივით ექცევიან. მაგრამ დარჩა, იმიტომ რომ ისე გამაჩერებს გეგონება “კოკაინი” გამქონდა. და ძალიან ინერვიულა.
ეხლა შეკითხვა: ამდენი მგზავრობის შემდეგ, ყველანაირი საბუთით და დასტურით, რომ არ მჭირდება არც აქ დარჩენა და არც არაფერი, 6 დღით ვარ სულ.
ჩვეულებრივ ტურისტს ქართველებს რას უშვებიან.
და რატომ, უბრალოდ რატომ ჩვენ ყველას ვუშვებთ ქვეყანაში შეკითხვას გარეშე.
ამას არ ქვია უვიზო რეჟიმი, ამას ჰქვია დამცირება, ჯობია ისევ ვიზა დააბრუნონ”.
ემილი, რომელსაც სოფო პოსტში ახსენებს, დიდი ბრიტანეთის წარმომადგენელი ემილი ვებლი-სმითია. მან და სოფომ ბოლო კვირეების განმავლობაში, პორტუგალიურ ობიდოსში ზედიზედ ორი 25-ათასიანი ტურნირი მოიგეს და ცხადია, იერუსალიმშიც ფავორიტთა შორის იქნებიან.
ამას გარდა, სოფო ძალებს ერთეულთა შეჯიბრშიც მოსინჯავს, სადაც მისი მეტოქე კვალიფიკაციის ერთ-ერთი გამარჯვებული იქნება.