ფეხბურთი

2:08 | 13.05.2019 | ნანახია [] - ჯერ

"აიაქსი" - ვირტუალურად ჩემპიონი

ამსტერდამის „აიაქსი“ ძალიან ახლოსაა ჰოლანდიის ჩემპიონობასთან. ერიკ ტენ ჰაგის გუნდმა ჩემპიონთა ლიგაზე განცდილი შოკი როგორც ჩანს დაძლია და ერედივიზიონის 33-ე ტურში საკუთარ მოედანზე „უტრეხტი“ 4:1 დაამარცხა.

არადა, სტუმრები პირველივე წუთზე დაწინაურდნენ, მაგრამ შემდეგ კლაას იან ჰუნტელაარმა, დონი ვან დე ბეეკმა და დუშან ტადიჩმა (ორჯერ) გაიტანეს და „აიაქსმა“ უპრობლემოდ მოიგო.

პარალელურად, პსვ ეინდჰოვენი, რომელსაც „აიაქსის“ დარად ამ ტურამდე 80 ქულა ჰქონდა, „ალკმაართან“ დამარცხდა (0:1) და ბოლო ტურის წინ პრაქტიკულად ყველაფერი გაირკვა. „აიაქსი“ უშუალო კონკურენტს 3 ქულით უსწრებს და ამასთან ბურთების ბალანსიც გაცილებით უკეთესი აქვს (115:31 „აიაქსი“ და 95:25 პსვ).

ბოლო ტურში „აიაქსი“ „გრააფსხაპს“ ესტუმრება, ხოლო პსვ ეინდჰოვენი „ფილიპს არენაზე“ „ჰერაკლესს“ დაუხვდება (ბოლო ტური 15 მაისს ჩატარდება).

მოკლედ, ამსტერდამული გუნდი ჩემპიონთა ლიგას დრამატულად კი დაემშვიდობა, მაგრამ ძალიან ახლოსაა დუბლთან (ჰოლანდიის თასი უკვე მოიგო) - ვირტუალურად ჰოლანდიის ჩემპიონია. ეს „აიაქსისთვის“ 2013-2014 წლების სეზონის შემდეგ პირველი, ხოლო ისტორიაში 34-ე ჩემპიონობა იქნება.

0.118509