რუსეთის პრემიერლიგის 27-ე ტურში, სანკტ პეტერბურგის „ზენიტმა“ გროზნოში „ახმატთან“ 1:1 ითამაშა, მაგრამ რადგან უშუალო მდევარმა, „ლოკომოტივმა“ ტულაში „არსენალთან“ 0:2 წააგო, ნევისპირელები ტურნირის დამთავრებამდე სამი ტურით ადრე გახდნენ რუსეთის ჩემპიონები.

„ზენიტი“ ისტორიაში მეხუთედ გახდა ჩემპიონი. ბოლო ოთხ წელიწადში კი მეოთხე გამარჯვებულია: 2016 წელს - ცსკა, 2017 – „სპარტაკი“ (ჯანო ანანიძე), 2018 – „ლოკომოტივი“ (საბა კვირკველია), 2019 – „ზენიტი.“

„ზენიტს“ რუსეთის ჩემპიონის თასს სამუდამოდ გადასცემენ, რადგან რსკ-ს დებულებაში წერია: ჩემპიონის თასი სამუდამოდ გადაეცემა გუნდს, რომელიც სამჯერ ზედიზედ, ან ჯამში ხუთჯერ გახდება გამარჯვებული.

ტრიუმფამდე „ზენიტი“ სერგეი სემაკმა მიიყვანა, რომელიც გუნდის მთავარი მწვრთნელი სეზონის დასაწყისში გახდა.