თორნიკე შენგელიას “ბასკონია” ევროლიგის მეოთხედფინალურ სერიაში ჩაება, თუმცა, მოსკოვში ცსკა-სთან გამართული პირველი მატჩი უშანსოდ წააგო.

ესპანურმა გუნდმა ფავორიტად შერაცხულ მეტოქესთან პირველი ტაიმი მხოლოდ 4 ქულით (40:44) დათმო, შესვენების შემდეგ კი, “არმიელებს” ვერაფერი დაუპირისპირა – 68:94.
ქართველი კალათბურთელი თამაშში სათადარიგოთა სკამიდან ჩაერთო და 18:54 წუთში 6 ქულა, 1 მოხსნა და 2 ჩაჭრა მიითვალა. შენგელიამ 4-დან 1 ორქულიანი, 3-დან 1 სამქულიანი და 2-დან 1 საჯარიმო ჩააგდო, ბურთი ერთხელ დაკარგა, 2 პერსონალური ფოლი მიიღო, მის წინააღმდეგ კი 4-ჯერ დაჯარიმდნენ.

სტუმართა მხრიდან 10-ქულიან ზღვარს შევონ შილდსი (17), ვინსენ პუარე (12) და დარუნ ჰილარდი (12) ასცდნენ, ცსკა-ს კი სერხიო როდრიგესმა (19), კორი ჰიგინსმა (12), ნანდო დე კოლომ (11), ვილ კლაიბერნმა (10) და ნიკიტა კურბანოვმა (10) ულიდერეს.
სერიის მე-2 მატჩი ისევ მოსკოვში 18 აპრილს შედგება.
ცნობისთვის, მეოთხედფინალი ასევე დამაჯერებელი გამარჯვებით (76:43) გახსნა სტამბულის “ფენერბაჰჩემ”. თურქულმა გრანდმა შინაურ კედლებში ლიტვური “ჟალგირისი” გაანადგურა.
დღეს, კიდევ ერთი თურქული კლუბი “ანადოლუ ეფესი” ესპანურ “ბარსელონას” მიიღებს, მადრიდის “რეალი” კი ათენის “პანათინაიკოსს” უმასპინძლებს.