საქართველოს კრისტალბეთ ეროვნულ ლიგა 2-ს მეექვსე ტურის შემდეგ ახალი ლიდერი ჰყავს - „სამტრედია“. ეს, მას შემდეგ, რაც იმერლებმა თავისი მატჩი მოიგეს, ხოლო თბილისის „მერანმა“ ქულები დაკარგა.

„სამტრედიამ“ ფოთის „კოლხეთს“ უმასპინძლა და პირველივე ტაიმში მოპოვებული სოლიდური უპირატესობა არ გაუნიავებია. გიორგი ახალაძემ და გურამ სამუშიამ მასპინძელთა უპირატესობა 35-ე წუთისთვის სოლიდური გახადეს. მეორე ნახევარში „კოლხეთმა“ მხოლოდ ის შეძლო, რომ ანგარიშის სხვაობა შეამცირა. ამრიგად, „სამტრედიამ“ 14 ქულა დააგროვა და ერთპიროვნული ლიდერია.

ყოფილი ლიდერი „მერანი“ კი „შევარდენთან“ ვერაფერს გახდა. მატჩი უგოლოდ დასრულდა და შესაბამისად, გუნდებმა ქულები გაინაწილეს.

როგორც იქნა მოიგო ლანჩუხთის „გურიამ“ და ერთბაშაბად ორი საფეხურით დაწინაურდა. გურულებმა შინ ქობულეთის „შუქურას“ დამაჯერებლად აჯობეს.

სამაგიეროდ, ბოლო საფეურზე დაქვეითდა „ზუგდიდი“, რომელსაც განვლილ 6 ტურში კინკილა ქულა აქვს მოპოვებული და ერთადერთი მოუგებელი გუნდია. მეგრელები ამჯერად „ცხინვალთან“ დარჩნენ უშანსოდ და 0:3 წააგეს.

„თელავმა“ კი „გაგრას“ აჯობა და მესამე ადგილზე აინაცვლა. კახელებმა სეზონი კარგად დაიწყეს, ჯერაც არ წაუგიათ და ასე თუ გააგრძელებენ, კრისტალბეთ ეროვნულ ლიგაში აღზევების რეალური კანდიდატებიც გახდებიან.

„შევარდენი“ – „მერანი“ (თბ) 0:0 (0:0)

„ცხინვალი“ – „ზუგდიდი“ 3:0 (1:0)

გოლები: 1:0 სიჭინავა (33), 2:0 სიჭინავა (90), 3:0 გამცემლიძე (90)

„თელავი“ – „გაგრა“ 3:1 (2:1)

გოლები: 0:1 ბრეგვაძე (40), 1:1 მარაქველიძე (42), 2:1 ტატანაშვილი (45, პენ), 3:1 პუდი (64)

„გურია“ – „შუქურა“ 2:0 (2:0)

გოლები: 1:0 სკოტარენკო (11), 2:0 ტუღუში (26)

„სამტრედია“ – „კოლხეთი“ 2:1 (2:0)

გოლები: 1:0 ახალაძე (9), 2:0 სამუშია (35), 2:1 გოგიძე (59)