თურქულ ანტალიაში დაწყებული გრან პრის სასტარტო დღეს ქართულ დელეგაციას 1 ბრინჯაოს მედლის აღების შანსი აქვს. კვარცხლბეკზე ასასვლელად ბაგრატ ნინიაშვილი (66 კგ.) იბრძოლებს, რომლის მეტოქეც რუსი აბდულა აბდულჟალილოვი იქნება.

ნინიაშვილმა გზიდან თურქი აბდულა ბერკინ ოზკანი (იპონით), ბრაზილიელი ჩარლეს ჩიბანა (ვაზარით) და პორტუგალიელი ჟოაო კრისოსტომო (იპონით) ჩამოიცილა, ნახევარფინალში კი, რუს მიხაილ პულიაევთან ვაზარით დაწინაურდა, თუმცა, უპირატესობა ვერ შეინარჩუნა და დამატებით დროში მე-3 შიდოს გამო წააგო.
ამავე წონაში ვანო მახათაძემ ბოტსვანელი გევინ მოგოპა დააიპონა, ჩინელ ჟიქიან ვუს ვაზარით აჯობა, თურქ სინან სანდალს კი იპონი აგემა. ქართველმა ძიუდოისტმა მეოთხედფინალი მომავალ ფინალისტ – მოლდოველ დენის ვიერუსთან იპონით წააგო, რეპეშაჟში კი ხსენებულ აბდულჟალილოვთან ასევე იპონით დამარცხდა.
60 კგ-მდე წონით კატეგორიაში ჯაბა პაპინაშვილმა საწყისი ორთაბრძოლა ტაივანელ იუნ ვეი იანთან იპონით დათმო, ხოლო ირაკლი კუპატაძე იპონით ჩეხ დავიდ პულკრაბეკთან დამარცხდა.
ტატამზე ვიხილეთ საქართველოს ქალთა ნაკრების წევრებიც. 48 კგ-ში ნატალია ყიფშიძემ ჩინელ იაო ქსიონთან იპონით წააგო, ტატიანა ლევიცკა-შუკვანი (52 კგ.) ასევე იპონით ჩინელვე ლიპინ ლიუსთან დამარცხდა, 57 კგ-მდე წონით კატეგორიაში კი ორმა ჩვენებურმა იასპარეზა: ეთერ ლიპარტელიანი გერმანელ საპჰო კობანს ვერ გაუმკლავდა (მეტოქემ იპონით იმარჯვა), ხოლო მარიამ ჯანაშვილმა იპონით ებრაელ მააიან გრინბერგთან წააგო.
ფინალური ბლოკი თბილისის დროით 18:00 საათზე დაიწყება.