საქართველოს ნაკრების მთავარმა მწვრთნელმა ვლადიმირ ვაისმა ირლანდიასთან მატჩამდე პრესკონფერენცია გამართა. დუბლინში, სლოვაკი სპეციალისტი ისტორიის შეცვლას იმედოვნებს.

ვაისის განცხადებით, ირლანდიაში საქართველო გამარჯვებისთვის ჩავიდა, თუმცა ადვილ თამაშს არ ელოდება.

„მომავალ წელს შანსი გვაქვს ქართული ფეხბურთისთვის განსაკუთრებული რამ გავაკეთოთ, მაგრამ ახლა ამ თამაშზე ვართ კონცენტრირებული. ჯგუფიდან ორი გუნდი გადის და უნდა ვეცადოთ. თუმცა, ეს ადვილი არ იქნება. ჯგუფის ფავორიტი შვეიცარიაა, შემდეგ მოდიან ირლანდია და დანია, ხოლო მერე ჩვენ და გიბრალტარი. ვეცდებით ეს გავაკეთოთ.

ზოგჯერ ცხოვრებაში სასწაულები ხდება, მაგრამ ხვალინდელი შეხვედრა გამოაჩენს რამდენმად გვექნება ამ ჯგუფის შემდეგ მატჩებში შანსი.

არცერთი თამაში ადვილი არაა. ისტორია ჩვენს სასიკეთოდ არ მეტყველებს, ან ვაგებდით, ან ფრეს ვთამაშობდით. თუმცა, ახლა ვეცდებით ეს ისტორია შევცალოთ, გავიმარჯვოთ, რადგან გვინდა ამ ჯგუფიდან გასვლის შანსი შევინარჩუნოთ. ჩვენ გვჭირდება ქულები, ვინაიდან სახლში ჯგუფის ფავორიტ შვეიცარიასთან დავმარცხდით.

ვნახოთ ამის გაკეთებას თუ შევძლებთ. ვიცით, როგორ შეგვიძლია თამაში, მაგრამ ეს მოედანზე უნდა ვაჩვენოთ. მიკ მაკარტი? ახალი მწვრთნელი ყოველთვის სიახლეს ნერგავს გუნდში, მაგრამ ამაზე საუბარი არ მინდა, რადგან მარტინ ონილი ჩემი მეგობარია და მან ირლანდიის ნაკრებში დიდი სამუშაო გასწია.

ეს არ იქნება ადვილი თამაში, მაგრამ გამარჯვება გვინდა. სლოვაკეთის ნაკრებში ირლანდიასთან ორჯერ ფრე ვითამაშე, საქართველოს ნაკრებით ერთხელ დავმარცხდი, ერთი მატჩი ფრედ დასრულდა. ვეცდებით, რომ ეს ყველაფერი შეიცვალოს“, - განაცხადა ვაისმა.

შეგახსენებთ, ირლანდიისა და საქართველოს ნაკრებთა მატჩი 26 მარტს, დუბლინში, „ავივა სთედიუმზე“ თბილისის დროით 23:45 საათზე დაიწყება.