დინამო ირაკლი ხოშტარიას კონსპექტებით იგებს. მწვრთნელი, რომელიც სამაგალითოდ კარგია. მწვრთნელი, რომელიც საკუთარ თავზე პერმანენტულად მუშაობს და მწვრთნელი, რომელიც იზრდება. და მწვრთნელი ენდობა ჯორდან სვოფშირს. ამერიკელს, რომელიც ასრულებს.

სვუფშირის საშუალო სტატისტიკა რესპექტაბელურია. 14.7 ქულა (XIV ადგილი სუპერლიგაში), 6.9 მოხსნა (XVI), ერთ-ერთი სტაბილური სროლა შორიდან და ენერგიული დაცვა. არის ეპიზოდები, როდესაც მწვრთნელი მისი თამაშით უკმაყოფილოა, მაგრამ ჯორდანი უმატებს.

სვოფშირი კარგია თითქმის ყველა გუნდთან. მხოლოდ მგზავრებთან (5.5 ქულა ორ მატჩში) ვერ იღებს ფორვარდი საშუალოდ 10 ქულაზე მეტს და კაქტუსთან მისი შედეგიანობა არის საშუალოდ 22 ქულა. ფლეი ოფში სვოფშირი გუნდის ჯოკერი უნდა იყოს. დემაგოი ბუბალოსთან, კიდევ რამდენიმე კარგ მოთამაშესთან და რა თქმა უნდა, მთავარ მწვრთნელთან ერთად.

სვოფშირთან საუბარი ბოლო შეხვედრით დავიწყეთ. კაქტუსთან 83:70 მოგებულ ტესტში მან ორივე გუნდში ყველაზე ბევრი - 22 ქულა აკრიფა. 8/4 სამიანი, სამივე ორიანი ზუსტად შეასრულა, იყო კარგი დაცვაში.

ჯორდან სვოფშირი: გუნდურად მოვიგეთ. ისე, როგორც ყოველთვის ვიგებთ. ტემპის დაგდება სახიფათოა. უნდა შევინარჩუნოთ ეს განწყობა და ვიყოთ მონდომებულები.

ფლეი ოფის პერსპექტივა.
ჯ.ს: ჯერ რთულია ფლეი ოფზე საუბარი. ჯერ ცოტა ადრეა. რეგულარული გვაქვს დასამთავრებელი. კარგი განწყობა უნდა გვქონდეს. ეს მნიშვნელოვანია. ვარჯიშებზე მაქსიმუმი უნდა გავაკეთოთ. ეს მიდგომა თამაშზეც გადავა. ჩემპიონობისთვის გუნდი ყველა კომპონენტში ერთიანი და მონდომებული უნდა იყოს.

თანაგუნდელებზე.
ჯ.ს: დინამოში ძალიან კარგი ბიჭები არიან. ცდილობენ, ჩემს გვერდით იყვნენ და მაქსიმალურად მეხმარებიან. ეს ბევრს ნიშნავს და ეს გვეხმარება თამაშის დროს. ერთად ყოფნა აუცილებელია. დინამოში მე თავს კარგად ვგრძნობ.

მთავარ მწვრთნელზე.
ჯ.ს: მან იცის, როგორ მიიღოს მაქსიმუმი კონკრეტული მოთამაშისგან. არაფერს არ ართულებს. მხოლოდ საქმე და მარტივი ახსნა, ვინ რა უნდა გააკეთოს.

საკუთარ თავზე.
ჯ.ს: იმედი მაქვს, გუნდს მაქსიმალურად დავეხმარები, ჩავაგდებ ჩასაგდებს და მწვრთნელის დავალებას შევასრულებ. ყველა მატჩი მნიშვნელოვანია და ჩემთვის ბევრს ნიშნავს დინამოში ყოფნა. მადლობა გუნდს ნდობისთვის.