ქართული ფიგურული ციგურაობის ლიდერმა მორის ყვითელაშვილმა იაპონიის ქალაქ საიტამაში გამართულ მსოფლიოს ჩემპიონატზე მე-13 ადგილი დაიკავა.

შეგახსენებთ, რომ 24 წლის ყვითელაშვილი მოკლე პროგრამის შემდეგ მე-12 იყო, თავისუფალ პროგრამაში კი 158.07 ქულა (82.59 ტექნიკური ელემენტებისთვის+76.48 პროგრამული კომპონენტებისთვის, მინუს 1 ქულა დაცემისთვის) მიიღო და მე-13 შედეგი დააფიქსირა.
ჯამში, მორისმა 240.74 ქულა მიითვალა და მსოფლიო პირველობა მე-13 პოზიციაზე დაასრულა.
კვარცხლბეკის უმაღლეს საფეხურზე ამერიკელი ნათან ჩენი ავიდა, რომელმაც 323.42 ქულა მოაგროვა და მსოფლიო პირველობის ოქრო ზედიზედ მეორედ მოიპოვა. ვერცხლი იაპონელმა იუძურუ ჰანიუმ (300.97) აიღო, ბრინჯაო კი - კიდევ ერთმა ამერიკელმა ვინსენ ჟუმ (281.16).