იაპონიის ქალაქ საიტამაში მიმდინარე მსოფლიო ჩემპიონატზე ფიგურულ ციგურაობაში დასრულდა ვაჟთა ტურნირის მოკლე პროგრამა, რომელშიც მონაწილეობა ქართველმა მორის ყვითელაშვილმაც მიიღო და მე-12 შედეგი დააფიქსირა, შესაბამისად, ჩვენებური ძალებს ფინალშიც სცდის.

ყვითელაშვილმა დღევანდელი გამოსვლისთვის 82.67 ქულა (47.10 ტექნიკური ელემენტებისთვის+36.57 პროგრამული კომპონენტებისთვის) მიიღო და ევროპელ სპორტსმენთა შორის მე-6 მაჩვენებელი ჰქონდა.
მოკლე პროგრამის შემდეგ ლიდერი მსოფლიოს მოქმედი ჩემპიონი ნათან ჩენი (აშშ) გახლავთ 107.40 ქულით, შემდეგ კი ასევე ამერიკელი ჯეისონ ბრაუნი (96.81) და ორგზის მსოფლიო და ორგზის ოლიმპიური ჩემპიონი იაპონელი იუძურუ ჰანიუ (94.87) მოდიან.
ვაჟები თავისუფალ პროგრამას 23 მარტს შეასრულებენ, ყვითელაშვილი კი, საუკეთესო 24 მონაწილეს შორის, ბოლოსწინა ექვსეულში ისრიალებს, რაც უკვე კარგი შედეგია.