მილანის „ინტერი“ მაურო იკარდის შემცვლელს ეძებს. არგენტინელ ფეხბურთელს კლუბის ხელმძღვანელობასთან და ქომაგებთან უკვე კარგა ხანია კონფლიქტი აქვს, რის გამოც დიდი ალბათობით, ზაფხულში გუნდს დატოვებს.

მილანში იკარდის ერთ-ერთ შემცვლელად რობერტ ლევანდოვსკის მოაზრებენ. ამის შესახებ პოლონური გამოცემა Onet-ი იტყობინება. ჯერჯერობით შესაძლო ტრანსფერის ფინანსური დეტალები არ ხმაურდება.

ლევანდოვსკიმდე „ინტერს“ პაულო დიბალასაც უკავშირებდნენ, რომელიც „იუვენტუსის“ ღირსებას იცავს.

მიმდინარე სეზონში ლევანდოვსკიმ „ბაიერნის“ მაისურით ყველა ტურნირზე ჩატარებულ 31 მატჩში 22 გოლის გატანა შეძლო.